Tu nge a ṭha ber chu ni dawn? Ronaldo, Messi nge Neymar?

Khawvela football thuneitu sang ber FIFA buatsaih The Best FIFA Football Awards semna chu zanin hian Bloomsbury Ballroom, London-ah neih a ni dawn. Best FIFA Men’s Player dawng thei tura chhawp chhuah chu Cristiano Ronaldo, Lionel Messi leh Neymar te an ni.

Football hunpui hi TV lama pekchhuahna tur hi he thuziah lai chuan puanzar a la ni lo a, en duh tan chuan zanin dar 11:00 aṭangin FIFA.com-ah live streaming hmangin a en theih ang.

'The best' chu eng nge?

The Best FIFA Football Awards hi a ṭum hnihna tur chauh a ni a, a hmasa ber chu kumin January thla khan Zurich, Switzerland-ah neih a ni.

FIFA hian kum 1991 aṭang­in mimal chawimawina an pe

ṭan a, Germany legend Lothar Matthaus chu FIFA World Player of the Year atana thlan hmasak ber a ni. Kum 2009 thleng khan FIFA World Player of the Year hming puin kalpui a ni a, Lionel Messi chu dawng hnuhnung ber a ni.

Kum 2010 aṭangin FIFA leh Ballon d'Or buatsaihtu France football te chu an thawk ho a, chawimawina hming chu FIFA Ballon d'Or-ah thlak a ni. Argentina thiampuipa Messi chu a dawng hmasa ber a ni a, kum 2015-ah pawh a dawngtu chu Barcelona star Messi tho a ni.

FIFA leh France Football thawh hona a tawp a, Ballon d'Or hming chu a neitu France Football lamin kalpui zelin FIFA-in kum 2016 aṭangin 'The Best FIFA Football Awards' chu an kalpui

ṭan ta a, Portugal captain Cristiano Ronaldo chu he chawimawina dawng hmasa ber a ni.

Kuminah mi thar?

Football khawvela mimal chawi­mawina hi chu Cristiano Ronaldo emaw Lionel Messi tana siam ni berin a lang tawh a, tun ṭuma hming lang tel ve Neymar pawh hi a tikimtu chauh a ni thei ang a, Brazil captain hian chawimawina a dawng a nih chuan mak tih a hlawh hial zawk ang.

Neymar hian an ram Brazil chu World Cup khel turin a tlin pui satliah lo a, Russia pan theihna ticket nei hmasa ber an ni. Barcelona tan pawh season liam ta khan Neymar hi a khel ṭha a, assists vawi 21 zet a nei pha hial a, tun season khan khawvel player manto ber ni turin Paris Saint-Germain a zawm. Neymar hian PSG a zawm chhan hi mimal chawimawina a dawn duh vanga sawi a awm a, amaherawhchu tun ṭumah hi chuan Barcelona tana a khelh hun lai en tur a nih mah avangin dawng tura beiseiawm lo ber a ni.

Lionel Messi a tel loin Argen­tinian national team eng teh ruai an ni lo a, La Pulga (Messi kohna - The Flea) hi club leh ram tan a vul zel. Season liam ta khan league-ah goal 37 khungin Barcelona chu season tawp thlengin champion thei dinhmunah a dintir a, a vawi li nan Pichichi Trophy (La Liga top scorer) chawimawina a dawng. Barca-in Copa del Rey an champion-na kawngah Messi hi a pawimawh hle.

Cristiano Ronaldo-in Best FIFA Men's Player Award dawng nawn turin a thawk hnem tawk a, rinkai ber a ni. Real Madrid forward Ronaldo hian a club khelhna chu La Liga leh FIFA Club World Cup-ah a champion pui bakah UEFA Champions League-ah a champion pui bawk.

Category hrang hrang leh nominee
The Best FIFA Men’s Player
Cristiano Ronaldo Real Madrid/Portugal
Lionel Messi Barcelona/Argentina
Neymar Barcelona/PSG/Brazil
The Best FIFA Goalkeeper
Gianluigi Buffon Juventus/Italy
Keylor Navas Real Madrid/Costa Rica
Manuel Neuer Bayern Munich/Germany
The Best FIFA Men's Coach
Massimiliano Allegri Juventus
Antonio Conte Chelsea
Zinedine Zidane Real Madrid
The Best FIFA Women's Player
Deyna Castellanos Santa Clarita Blue Heat/Venezuela
Carli Lloyd Houston Dash/Man City/United States
Lieke Martens Rosengård/Barcelona/Netherlands
The Best FIFA Women's Coach
Nils Nielsen Denmark
Gérard Prêcheur Lyon
Sarina Wiegman Netherlands
FIFA Fair Play Award
November 2016 - August 2017 chhunga official match-a player, coach, team, match official, fan emaw fan group emaw te zinga chet ze mawi bik lantir hnenah pek tur a ni.
FIFA Puskas Award
Goal mawi khungtu hnenah FIFA Puskas Award hi hlan ṭhin a ni a, tun ṭuma dawng thei tura thlanchhuah pathum te chu Venezuela hmeichhe team striker Deyna Castellanos, Arsenal striker Olivier Giroud leh South African club Baroka player Oscarine Masuluke te an ni. Arsenal striker Giroud hi January 1, 2017-a Crystal Palace lama goal ropui a khung vanga tel a ni.
FIFA Fan Award
November 2016 - August 2017 chhunga football fan chemawi hnenah he chawimawina hi hlan tur a ni a, dawng thei tura chhawpchhuah te chu Borussia Dortmund, Celtic leh Copenhagen ṭantute te an ni.
April thlaa Dortmund leh Monaco te Champions League-a an inkhelh ṭumin Dortmund player-te bus chuan beih a tawh avangin inkhelh hun sawn hlat a ni a, hemi
ṭum hian German club ṭantute chuan social media lamah beihpui thlakin #bedforawayfans hmangin Monaco ṭantute chu an ina thleng turin an sawm a, an chet dan mawi tak hian khawvel a deng chhuak a ni.