City tana goal khung hnem ber Aguero

Sergio Aguero chuan Manchester City tana goal khung hnem ber record chelhtu Eric Brook (177 goals) a nih rual ta. Inrinni zan khan Argentine stri­ker hian Burnley lakah goal hmahruai khungin a club hi 3-0 in hnehna a chan pui.

Etihad Stadium-ah damkawr Aguero-a'n penalty aṭanga goal hma­hruai khungin inkhel tawp lamah Nicolas Otamendi leh Leroy Sane ten an khung belh bawk. Pep Guardiola naute hian inelna hrang hrangah a zawnin match 11 chhung hnehna an chang a, an club record neih sa an tluk chiah bawk.

Pep-a'n Champions League khel chau Gabriel Jesus chu bench lamah chawlhtirin Aguero a maltlat tir a, an chak dawn tih a chian hnuah Jesus hian Aguero hi a rawn thlak - City tana goal khung hnem ber hi khelmual a chhhuahsan dawnah a mah chawimawi nan stadium chhunga fans chuan ding chungin chibai an buk.

City manager Pep Guardiola chuan, "Ague­ro hian goal dang a khung belh leh thuai ka beisei, he club tana a hun ropui a tawn ni hman pui theia kan awm hi a lawmawm hle a ni," tiin a sawi. Aguero hi kum 29 mi chauh a la ni a, Brook nena an record inṭawm neih hi a kalsan ngeiin a rinawm.

Aguero hian kum 2011 khan Atletico Madrid

aṭangin Manchester City hi pound maktaduai 38 in a zawm a, tun hnaiah a chuanna car a chetsual avangin a nak ruh a hliam. An match hnuhnung pahnihah chuan bench-ah ṭhuttir ni mah se Pep-a'n khelhna hun a siamsak leh hmasa berah a hun ṭha a luanral tir lo.

Premier League hma­hruaitu hian inelna hrang hranga chak zawn rei an club record siam theihna hun ṭha an nei dawn. Thawhlehni zan hian League Cup khel turin Wolves an mikhual dawn a, kartawpah West Brom an lenchilh thung ang.