Chak loh nei lo Barcelona

Spanish La Liga season kal laia hneh loh la nei lo Barcelona chuan chak ni hmel la hmu lo Malaga chu 2-0 in an hneh. Nou Camp-a inkhelah Catalan club tan captain Andres Iniesta chuan kum 2016 September thla hnua a vawi khat nan goal a khung ve leh chiah.

Barcelona tan minute hnihna lekah forward Gerard Deulofeu chuan club thar tana a goal hmasa ber a khung a, an goal hnihna hi second half ṭan tira Iniesta-a'n a hlap luh niin Lionel Messi siamsak a ni.

Argentina international Messi hian Barcelona tan La Liga match 391 a khelh aṭangin goal 500 zetah a inrawlh ta, goal 360 khungin assists vawi 140 a nei thung. Liverpool striker hlui Luis Suarez erawhin La Liga club a hmachhawn tawh zingah Malaga goal-ah chiah a la chhuih lut lo tluang zel rih.

Malaga hian season bul an ṭan chhe takzet a, match kua an khelhah point khat bak an la hmu lo. Barcelona erawh Atletico Madrid nen an inhnehtawk tih mai loh chu an la chak fai vek a, point 25 hmuin hmahruaitu an ni thung.

Manager thar Ernesto Valverde kaihhruaina hnuaiah Barca hi league lamah an la tlawm loh bakah Champions League-ah an la chak fai vek a, Thawhlehni zan hian Copa del Rey khel turin Division B club Real Murcia an lenchilh ang.