Bethlehem VT dinhmun a derthawng

Zirtawpni zan Mizoram Premier League inkhelah Bethle­hem Vengthlang FC-in phase 1-a an draw tawh Mizoram Police 2-4 in an hneh lo a, semifinal khel pha thei dinhmunah la ding mah se knockout stage thleng pha turin an din­hmun a derthawng ta hle.

BVT hi point 12 hmuin palinaah an awm a, an hnuaiah tun hnai match hniha an hneh loh pahnih Police leh Ramhlun North ten an dawt a, an inthlauh­na hi point khat chiah a ni tawh.

Chawngthansanga hote khelh hmabakah Aizawl FC, Dinthar FC, Chanmari FC, Chhinga Veng leh Chanmari West te awmin awlsam taka point hlawhchhuahna tur a awm lo.

Lammuala inkhelah BVT-in nung takin bul an ṭan a, Mizoram Police bulṭan dan tho a ni. Police tan a pa damloh vanga Lungleia zin lo Lalfakzuala a inlan thei tawh a, hattrick a siam.

Fakzuala chet ṭhat theih nan a kawppui F. Lalrinpuia a pawi­mawh a, Republic Veng tlangval hian Police forward Fakzuala goal khung tur vawi hnih a siamsak. Coach Lalbiaksanga Colney hnuaia harhtharna chang Lalsangbera'n penalty aṭangin goal lina a khung bawk a, Police-in inkhelh hmaa MPL6-a goal chhuah tlem ber BVT lakah goal li an khung.

BVT-in goal li an chhuah zanah huaisen takin hun tawp thlengin an khel a, 2-0 a nih laiin midfielder Lalnuntluanga'n an si phurh a sût ṭhen a. Hun tawp lamah si phurh sût ngei tumin defender PC Laldinpuia chu an tlanchhuahtir a, result danglam pha lo mah se hun tawp dawn a Tluanga penalty hmangin an mualpho tur an tiziaawm.

Tun season hi MPL awm tawha team intluk tlan ber ṭum a ni a, round 9 khelh zawh ni tawh mah se tla tur a la hriat theih loh. Hmahruaitu Chhinga Vengin semifinal ticket an nei tawh a, team dang pasarih erawh semifinal thleng thei vek an nih rualin tla thei vek an ni.

ZoFooty Statistics
Bethlehem VT 2 - 4 Mizoram Police
BVT : Lalnuntluanga 32', 89' (P)
MPFC : Lalfakzuala 17', 30', 50'; Lalsangbera 77' (P)
MoM : Lalfakzuala, MPFC
52% Ball Possession 48%
17(8) Shots (On Target) 20(9)
1 Yellow Card 2
0 Red Card 0
Powered by Rainbow Multibrand Mobile Showroom