FIFA U17 World Cup ; England leh Mali ten semifinal thleng

Liverpool rawlthar Rhian Brewster-a hattrick hmangin England-in FIFA World Cup Under 17 semifinal lut turin United States 4-1 in an sawp a, Africa ram pahnih inkhelah Mali-in vawi hnih champion tawh Ghana 2-1 in an hneh ve bawk.

Nizan khan quarterfinal match hnih khelh a ni a, result kan hre hman lo. England hian October 25, tlai dar 5:00-ah Germany leh Brazil chak zawk an hmachhawn ang a, semifinal hnuhnung zawk hi zan dar 8:00-a khelh tur niin Mali-in Spain leh Iran inkhela chak zawk an hmachhawn bawk ang.

Eaglets an chak

Indira Gandhi Athletic Stadium, Guwahati-a inkhelah ruahsur vangin khelmual a huh a, inelna hnuhnung bera finalist Mali-in first half an thunun. Minute 15-na lekah Hadji Drame-a'n tun inelnaa a goal thumna ni turin Ghana tlarhnung a tlan pelh hnuah Black Starlets goalkeeper Danlad Ibrahim dan theih loh turin Eaglets hmahruaina a khung.

First half-ah Ghana-in Ibrahim Sulley hmangin an siphurh an sutah an ngai a, amaherawhchu a teammate Kudus Mohammed-a'n foul a neih hman avangin pawm a ni lo.

Minute 61-naah Mali bawkin goal an khung a, Djemoussa Traore-a'n vei lam kil aṭanga pet chu Ghana keeper Danlad Ibrahim chuan chhut sualin a nam fuh tawk lo a, Eaglets-in goal hnihna an khung.

Minute 20 la awmin Ghana substitute Sadiq Ibrahim penalty hlawhchhuah chu Mohammed-a'n siphurh sut ṭhen nan hmang mah se hun tawp lam inkhel tihmuhnawmtu chauh a ni.

Mali-in U17 World Cup history-a a vawi hnih nan semifinal an thleng a, captain Mohamed Camara chuan yellow card a hmuh avangin an khelh leh turah a inlan thei dawn lo a, hei chiah hi lawm lohna tur awmchhun a ni.

Brewster-a hattrick

England innghahna Jadon Sancho chu a club khelhna Borussia Dortmund-in chhuhsak mah se Three Lions tan Liverpool rawlthar Rhian Brewster-ainlar a, United States lakah buaina an nei lo.

Goa-a inkhelah Brewster hian Manchester City forward Philip Foden thawhrah sengin minute 11-na leh

14-naah a khung nghal a, England dinhmun a ṭha nghal. United States lamin chhan let tum mah se Ayo Akinola, Taylor Booth, Blaine Ferri leh Tim Weah ten chance ṭha an hlah vek a, Josh Sargent-a crossbar tauh per chu first half-a an chance neih ṭha ber a ni.

Second half-ah England bawk an chungnung a, goal hnih khungtu Brewster-a'n minute 64-naah Morgan Gibbs White khung tur a siam sak a, Goa-ah Liverpool rawlthar a langsar hle. USA-in Sargent hmangin goal khat khung ve mah se injury time-ah Brewster-a'n ama penalty hlawhchhuah chu hattrick siam nan a hmang a, penalty chawitu substitute Sergino Dest chu hnawhchhuah a ni.