Goerges tan nomawi

German tennis player Julia Goerges chuan Daria Kasatkina chu straight set a hnehin tun hnai kum ruk chhunga a vawi khat nan WTA title a la ve leh ta.

Inrinni zan khan Moscow-ah Kremlin Cup final khelh niin German nula Goerges hian tulchhung player Kastakina chu 6-1, 6-2 in a hneh. Goerges hian kuminah final vawi li a khelhna a ni a, a hmasa pathumah pahnihna ni mah se tunah chuan a hun a thleng ve ta a ni.

World number 20 huanga inhlangkai thar tur Goerges chuan, "He hun tawng tur hian ka thawkrim a, a chang chuan beidawn chang nei mah ila huaisen taka kan beih hram hram chuan lawmna kan tawng ve leh ṭhin," tiin a sawi.