Chanmari harhna beng daitu Police

Chanmari FC-in result ṭha beiseiin coach tawnhriat nei ṭha K. Malsawmkima an lalut a, Zirtawpni zan khan Mizoram Police hmachhawnin football hmuhnawm lantir mah se 1-1 in inkhel a tawp. RG Stadium zan inkhelah hian Chanmari tan minute kuana lekah Lalhriatpuia'n goal hmahruai a khung a, Police-in substitute Lalnunsanga (Talea) hmangin minute 84-naah siphurh an sut.

Mala hnuaia Chanmari FC khelh dan hian MPL hmuhnawmna a rawn belhchhah ringawt lo a, MPL ngaihnawmna a rawn belhchhah tel. Chanmari hian attacking football an khel a, tawnhriat nei ṭha H. Lalmuankima'n captain armband hreng satliah loin mual vei lamah player hmuhnawm a ni a, Hriata goal khung pawh MK-a siamsak a ni.

Midfield-ah tawnhriat nei ṭha tho Bawngkawn tlangval Lalnuntluanga'n hmun pawimawh a chang pha a, man of the match-a thlan C. Lalhunmawia'n midfield-ah ball a sem ṭha viau bawk. Chanmari hian first half-ah a khat tawkin chance nei reng mah se an finishing a ṭha tawk lo a, Police keeper F. Lalmuanawma a che ṭha bawk.

Second half-ah Police coach Lalbiaksanga Colney-in inkhel a rawn thlak danglam a, substitution awmze nei siamin inkhel kalhmang a rawn thlak. Chanmariin an hun ṭha neih an bawhpelh rah an seng a, Armed Veng South tlangval Talea'n kawh zetin hun tawp dawnah a rawn pet goal - Chanmari ṭantute aiin Police ṭantute thawm a ring ta zawk. Hun tawp hma hretin Chanmari subsitute F. Lalnuntluanga'n chakna goal a khungah inngai mah se a kuta ball a khawih fuh avangin pawmsak a ni lo.

Chanmari coach K. Malsawmkima chuan, "Ka beisei phak bakin kan khel ṭha a, chak pawh kan phu. Mahse goal kan khung theih loh kan tuar a, point khat chauh kan hlawh chhuak. Kan khelh danah ka lawm a, kan result-ah ka lawm lo," tiin Vanglaini a hrilh.

Police coach Lalbiaksanga Colney chuan, "Game plan chi hnih kan nei a, inkhel kal hmang thlak danglam tur khan kan game plan pahnihna kan hmang. Inkhel bul ṭan ṭha lo mah ila a tawpah kha chuan chak thei dinhmunah kan ding," tiin a sawi ve bawk.