Chawnpui par a vul zel

Chawnpui FC-in coach Lalsangzuala Hmar hnuaiah match zawnin hnehna an chang. Sanga hian Khawzawlah a club hlui Chanmari FC a hneh a, Inrinni khan RG Stadium-ah a club hlui tho Electric Veng FC a hneh leh bawk.

Kartawp inkhelah hian Electric Vengin bul an ṭan ṭha zawk a, minute 37-naah Zothanpuia'n box pawn aṭangin mawi zetin a pet goal. Halftime-ah EFC-in hma hruai mah se Sanga'n chawlhlawk a hmang ṭha a, second half-ah an lehthal.

Khawzawla che ṭha MC Malsawmzuala'n goal khung chhunzawm lo mah se khelmualah a ṭangkai chhunzawm a, minute 69-naah MC-a ball pek ṭha chu Lallawmsanga'n a khung. Player hmuhnawm K. Vanlalhriatzuala ball pet EFC keeper C. Vanlalhriata'n dang mah se a per chu Chawnpui tan Laltlanzova'n minute 73-naah chakna goal khung nan a hmang.

Season bul ṭan ṭha tawk lo Chawnpuiin par an chhuah ṭan a, a sang pali zingah la awm lo mah se palinaa awm Chhinga Veng nen an inthlauhna chu point khat chauh a ni a, second phase boruak a sang dawn.