Chhingcows-in Bethlehem an chelh

Zote Honda MPL9-ah Chhinga Vengin hneh loh nei loin phase 1 an hmang zo a, result ṭha tak niin lang mah se draw ṭum nga ngawt an neih avangin palinaah an awm. Chhingcows hian Inrinni zan khan FC Bethlehem an hmachhawn a, 0-0 in an inhnehtawk.

RG Stadium-a inkhelah hian team pahnih an fimkhur a, Bethlehem an chungnung hret chungin goal an khung thei lo. FCB coach Victor Lalbiakmawia'n tlarhnungah player panga a dah a, ding leh vei lama wing back ten goal nawr an puih tawk loh avangin Chhingcows tlarhnung ṭhiah an harsat.

Bethlehem forward Isak Vanlalruatkima a hmuhnawm a, chutihrualin FCB tlarhmaten Chhingcows keeper RS Lallawmzuala an paltlang thei lo. Khawzawla Aizawl FC lama goal hnih khungtu Chhinga Veng inkhel a nung tawk lo a, Bethlehem tlarhnung tan harsatna an siam pha meuh lo. Chhingcows tan champion turin tlarhma siam ṭhat a ṭul a, FCB tan tlarhnung tih phuia point hmuh chhoh zel a pawimawh ang.