Kane a telna Spurs an ṭha

Premier League champion turin Arsenal leh Manchester City an langsar a, tunah erawh Tottenham Hotspur lam hmaih a thiang lo. Antonio Conte hote hian league match 10-ah point 23 hlawh chhuakin 1963-64 season hnua an chet ṭhat ber ṭum a ni.

Inrinni zan khan Tottenham-in Everton an mikhual a, Harry Kane-a penalty leh Pierre-Emile Hojbjerg te goal hmangin 2-0 in hnehna an chang. Toffees hian bul ṭan ṭha zawkin chance pawh insiam mah se second half-ah an chesual.

England keeper Jordan Pickford-a'n a tihper avangin Kane-a'n penalty a hlawh chhuak a, minute 59-naah hmahruaina goal a khung. Minute 86-naah Spurs-in mawi takin Everton tlarhnung an ṭhiat a, Rodrigo Bentancur cross chu 'cool' takin Hojbjerg-a'n a khung.

Spurs tan chanchin duhawm vek a ni bik lo. Second half-ah hliam vangin Everton forward hlui Richarlison chu lakchhuah a ngai a, coach Antonio Conte chuan, "A hliam nat loh kan beisei. MRI tih hnuah a dinhmun kan hria ang," tiin a sawi.

Spurs chet ṭhatna phenah Conte a pawimawh a, Kane hming lam hmaih a thiang lo bawk. England captain Kane hian league match ngaah a zawnin goal a khung tawh a, league bikah goal kua a khung tawh. Kane hian Tottenham tan goal 258 a khung tawh a, Jimmy Greaves record siam goal 266 lehpel turin goal kua chiah a mamawh tawh a ni.