T20 Cricket World Cup an ṭan ta

2022 ICC Men's T20 World Cup chu nimin aṭang khan Australia-ah khelh ṭan a ni a, match hmasa berah Namibia chuan Sri Lanka an barakhaih nghal. Inelnaah hian group stage-ah team ṭha pariat an la tel lo.

Kardinia Park, Geelong-a inkhelah Namibia (163/7) hian Asia Cup 2022 champion Sri Lanka (108) chu 55 runs-in an hneh. Group A-ah Sri Lanka bakah Namibia, Netherlands leh United Arab Emirates te an awm a, a sang pahnihin Super 12 an lut ang.

Group B-ah Ireland, Scotland, West Indies leh Zimbabwe te an awm a, vawiin hian match hmasa ber an khel dawn. Chawhma dar 9:30-ah West Indies leh Scotland an inkhel ang a, tlai dar 1:30-ah Zimbabwe leh Ireland an inkhel ang.

Super 12-ah hian Afghanistan, Australia, Bangladesh, England, India, New Zealand, Pakistan leh South Africa te an tling sa a, group stage aṭangin team pali an tel belh leh ang. India awmnaah hian Bangladesh, Pakistan leh South Africa te an awm tawh a, team hnihin an belh leh dawn.