National Powerlifting C'ship-ah Mizo che ṭha

National Senior & Masters Classic Powerlifting Championships chu Bhadrawati, Chandrapur, Maharashtra-ah neih a ni a, Mizoram aiawha kalte an che ṭha. Kelsih tlangval Lalhriatrenga chuan 120+ kg category-ah silver medal a la a, bench press-ah 212.5 kg chawiin national record a siam.

Inelnaah hian Mizoram aṭangin rit chawi chak mi pali Jeremy Lallawmzuala, David Lallawmkima, Lalhriatrenga leh K. Malsawmdawngliana te an kal. 93 kg category-ah Thingsulthliah tlangval Jeremy Lallawmzuala chu a squat tawp berah a inhliam a, a khel zui thei ta lo. -120kg category-ah Republic Vengthlang David Lallawmkima chu palina a ni a, bench press leh squat-ah silver a chawi chhuak thung.

+120 category-ah Lalhriatrenga a che ṭha hle. Hriatrenga hian squat -340kg, bench -212.5kg leh deadlift -270kg chawiin Mizoram tan silver medal a chawi chhuak. Kelsih tlangval Hriatrenga hian kum 2021 pawh khan national bench press-ah gold a lo la tawh a, tun ṭumah hian bench press-ah 212.5 kg chawiin national record a ni.

Lunglei tlangval K. Malsawmdawngliana chu 120+ kg-ah telin inhliam vangin khel chhunzawm thei lo mah se bench press bikah 170 kg chawiin bronze medal a la bawk.

Mizoram Powerlifting Association chuan national-a result ṭha tak an neih avanga an lawmthu Vanglaini an hrilh a, hmasawn theihna lai tur ṭhahnem tak an neih thu an sawi tel bawk.