Ballon d’Or zaninah sem a ni dawn ta

Football khawvela mimal chawimawina ngaihhlut hlawh ber Ballon d'Or dawng tur chu zanininah puan a ni dawn ta a, tuin nge he award hi dawng ang, tiin football ngainatute an inzawt ṭan mek.

Ballon d’Or chanchina a vawi khat nan kum khat chhunga (calendar year) che ṭha ni loin season khata che ṭha aṭangin chawimawina dawng tur hi thlan a ni dawn a, zanina he award dawng tur chu 2021-22 season a che ṭhate aṭangin thlan a ni dawn tihna a ni.

Ṭum danga Ballon d'Or top three puan phawt a, chumi hnua award sem ṭhin pawh tihtawp a ni a, kuminah hian nominee 30 aṭangin award dawng tur hi puan tawp tur a ni ang.

Theatre du Chatelet, Paris-a sem tur award hi SONY TEN 2-ah zanin dar 10:20 aṭangin en theih tura pekchhuah a ni dawn a, SonyLIV app-ah en theih a ni ang a, L’Equipe YouTube channel leh website-ah a thlawnin a en theih dawn bawk - award sem ṭan tak hi zan dar 12:00 velah a ni dawn.

Tu nge dawng ang?
Ballon d’Or dawng thei tur hian Real Madrid, Liverpool leh Manchester City te chu player thawh hnem ber an ni a, player paruk ṭheuh an thawh - hming langsar ber erawh Karim Benzema a ni.

French striker hian season hman zawh takah khan Real tan match 46 khelin goal 44 a khung a, assist vawi 15 a nei tel bawk - Champions League leh La Liga nomawi an chawi theih nana player thawhhlawk a ni.

Season hmasaa Bayern Munich tana match 46-a goal 50 khungtu Robert Lewandowski chuan, "An cancel thut a nih loh chuan Benzema-a'n he award hi a dawng ngei ang," tiin a sawi!

Kum 34 mi Lewy hian 2019-20 season khan Bundesliga, Champions League leh DFB-Pokal-ah Bayern Munich a champion pui a, match 47-ah goal 55 khungin, Ballon d'Or dawng ngei tura ngaih a ni a, mahse, Covid-19 vangin sem a ni lo.

Hming langsar
Erling Haaland-a'n Premier League-ah a hming rawn chher viau mah se season hmasa aṭangin award teh a ni a, nomawi chawi a neih loh avangin Borussia Dortmund tana match 30-a goal 29 khung chu khawvela footballer ṭha ber nihtir turin a tawk lo mai thei.

Premier League Player of the Season Kevin De Bruyne-a'n season hmasa khan PL-ah City a champion pui a, match 45-ah goal 19 khungin assist vawi 14 a nei a, a awm viau.

Bayern Munich forward Sadio Mane-a'n season hman zawh takah Senegal tan AFCON nomawi a chawi a, World Cup a inpetkaipui a, Liverpool tan match 51-ah goal 23 khungin FA Cup leh League Cup-ah a champion pui.

Mohamed Salah-a'n match 51-ah goal 31 leh assist 16 a neih avangin en kan a harsa a, Lewy pawh awm tak a ni - zaninah hian keeper ṭha lawmman Yashin Trophy, hmeichhe Ballon d'Or leh kum 21 hnuai lam player ṭha ber Kopa Trophy pawh sem a ni ang.