Quartararo chetsual niah Alex Rins a chak

MotoGP season tawp boruak a sang chho hle, champion lai leh hmahruai mektu ni bawk Fabio Quartararo a chesual a, hma a hruaina a hloh nghal. Yamaha rider chetsual niah Alex Rins chuan hnehna a chang ve thung.

Nimin khan Phillip Island-ah Australian Grand Prix tlan niin, rider championship-a pahnihna ni chunga inelna hmachhawntu Francesco Bagnaia chu nimin intlansiak bikah pathumna a ni a, a elpui a chetsual avangin table hmahruaitu a nih theih phah.

Season tawp hmain intlansiak hmabak pahnih chauh a awm tawh. Malaysian leh Valencian Grand Prix chiah tlan tur an nei tawh a, table hmahruaitu leh pahnihna inthlauhna hi point 14 a ni, inlehthal theihna kawng chu a la zau.

A tawpah Rins
Suzuki bike khalhtu Rins hi a tira tlan chak leh hnehna chang tura rinkai ber a ni bik lo. Mahse, lap hnuhnung berah a che ṭha. A hmaa tlan Bagnaia a tlan pel phawt a, chumi hnuah amah ang bawka Spanish rider Marc Marquez a tlanpel zui leh bawk, 0.186 seconds lekin a chak.

Rins chuan, "Ka tlankawng ngainat tak mai Phillip Island-ah Suzuki bike ka khalh hnuhnunna ber tur a ni a, chumi huna hnehna ka chang thei hi ka lawm. Intlansiak tam tak awm mah se tun ṭuma mi hi chu ka hriatreng tawh tur a ni," a ti.

Honda rider Marquez tan pawh chanchin ṭha a ni. Hliam vangin hun rei tak a buai a, tunah chuan rider ṭha dangte el phak turin a inpeih leh ta tih a chiang, bike intlansiakna sang berah hian a hmasa zual pathum (podium) a chan vawi 100-na a ni nghal bawk.

Chetsualna
Kawng kawia a kual sual avangin Fabio Quartararo dinhmun a ṭha lo a, 22-naah a tlahniam nghal, a hnuah tihsual a neih zui leh avangin intlansiak a hmachhawn zui ve thei lo - Australia ram aṭangin point a hmuh belh ve ta lo.

Quartararo chuan, "Ka elpui ṭhenkhat ka tlan pel a, mahse chetsualna kha chu ka tihsual a ni. Tunah chuan tihsual neih a thiang tawh lo, engtiangin nge kawng dik kan zawh leh nghal theih ang tih chu ngaihtuah ngai a ni," tiin a sawi.

Championship hmahruaitu thar Bagnaia chuan, "Fabio a tlan thei tawh lo tih ka hria a, khami hnu kha chuan point hmu tura tlan tluan hrim hrim kha ka tan a pawimawh, lap hnuhnung bera min rawn lehpelh kha chu a pawi tawh lo," a ti.