Odisha tana chelh rual loh Mumbai

Kartawp Indian Super League-ah inkhel hmuhnawm hmuh tur a awm a, Inrinni zan khan Mizo lansarhna inkhelah Mumbai City chuan 2-0 in Odisha an hneh.

Mumbai City tan Shubham Sarangi (own goal) leh Bipin Singh ten goal khat ve ve an khung a, Odisha lamin a chhanletna tur an neih loh avangin Mumbai an chak.

Islanders (Mumbai sawina) tan Lallianzuala Chhangte leh Lalengmawia (Apuia) ten inkhel bul an ṭan a, Mumbai goal hmasa zawk hi Lianzuala thawhchhuah a ni.

Zirtawpni zan khan Mizo awm lohna Chennaiyin FC leh Bengaluru FC te chu 1-1 in an inhnehtawk a, Bengaluru tana Roy Krishna goal khung chu Chennai club-in Prasanth Karuthadathkuni hmangin an chhanglet - nizan inkhel result kan hre hman lo a, October 20 hma chu ISL match a awm rih lo ang.

A hming Lianzuala
Mumbai boss Des Buckingham-a'n ṭum dang ang thoin Lianzuala leh Apuia chungah rinna a nghat a, Mizo player langsar pahnih hian Mumbai tan inkhel bul an ṭan ve ve.

Goal lut loa chawlhlawk hman a nih hnuah, Mumbai tan minute 50-naah Lianzuala a inlar a, Lunglei tlangval hian Odisha defender rual a lam khum hnuah 'shot' a nei a, mahse, Odisha keeper Amrinder Singh chuan a lo dang.

Amrinder-a ball dan hian Odisha defender Shubham a per a, an lamah a goal ta tho - Lianzuala thawhrah a ni. Mumbai tan hun pek belhah Bipin Singh chuan a khung leh a, Odisha tan si phurh sutna hun a awm tawh lo.

Odisha tan forward Jerry Mawihmingthanga leh Isaac Vanmalsawma ten inkhel bul an ṭan a, Isak Vanlalruatfela chu bench aṭanga luhtir a ni bawk.

A ṭha zawk
Jerry leh Isaac ten goal khungna remchang nei mah se, uiawm takin an chance neih an hlah a, Hnahthial tlangval Isaac-a'n Mumbai keeper Phurba Lachenpa-a tlan chhuak hmua hla tak aṭanga a pet goal lote chu uiawm a tling.

Jamshedpur FC laka comeback ropui lantirtu Odisha an comeback zo lo a, thawnthu ngaihnawm ziah nawnna remchang an neih chu an chhawr thei lo.

Mumbai forward Lianzuala chuan, "Ka duhthu a la sam lo a, kha aia ṭha zawk khan ka la khel thei tih ka chiang. Mahse, point thum kan hmu a, chu chu a lawmawm ber a ni," tiin Vanglaini a hrilh.

Mumbai hian an match hmasa berah Hyderabad chu 3-3 in an inhnehtawkpui a, match hnihnaah hnehna an chan avangin an lawm khawp ang.

Inhnehtawk
Jawaharlal Nehru Stadium, Chennai-ah hnehna chan beiseiin Bengaluru an leng lut a, point khata lungawi zir chungin an haw - Sunil Chhetri captain-na hnuaia khel team hian an match hmasa zawkah sawisel theih takin NorthEast United an draw a, match hnihah point hnih an nei.

Bengaluru tan Roy Krishna chuan minute lina lekah goal hmahruai a khung a, Chennaiyin fan-te an reh ṭhap. Mahse, first half hun pek belhah Prasanth Karuthadathkuni chuan Chennaiyin tan si phurh a sut a, rilru hah lutuk loin chawlhlawk an hmang.

Chennaiyin tan Petar Sliškovic leh Jiteshwor Singh an hmuhnawm a, a pawimawh ber goal erawh an keng tel lo. Bengaluru tan keeper Gurpreet Singh Sandhu chu chhandamtu a ni a, a save hnem malh malh hle.

Hetihlai hian Chennaiyin keeper Debjit Majumder erawh minute 82-naah red card pek a ni - through ball um luttu Krishna chu penalty box pawnah a titlu a, red card hmu mah se a team a chhanhim.