Atletico chakna Griezmann-a goal 100-na!

Antoine Griezmann chuan Atletico Madrid tana La Liga-a a goal 100-na a khung a, Athletic Bilbao lakah a team chu 1-0 in hnehna a chanpui - table-ah pathumna ni zuiin, champion beiseina an chhi nung ve leh ta.

Griezmann hian October 10 khan Atletico hi Barcelona aṭanga a ngheta zawmin contract thar a ziak a, Madrid khaw club-ah hian kum 2026 thleng a khel dawn - Bilbao laka a goal hi contract thar a ziah hnua a goal hmasa ber a ni.

Kum 31 mi Griezmann tan tun season inelna hrang hranga match 12-a goal thum a khungna chiah a ni a, assist vawi thum a nei bawk - tun season-ah minute 90 khelh hi vawi thum chiah a nei.

French forward hian Atletico tana league-a goal 100 khung tling tur hian match 215 a mamawh a, assist vawi 41 a nei tel bawk - inelna hrang hrangah match 306 khelhsakin goal 144 a khung a, assist vawi 59 a nei bawk.

Sevilla-in coach thar an neih hnua a vawi khat nan hnehna an chang a, Nemanja Gudelj goal hmangin Real Mallorca chu 1-0 in an hneh.

La Liga club hian October 5 khan an coach Julen Lopetegui chu a hna aṭangin an chawlhtir a, a hnu lawkah Jorge Sampaoli an lalut zui - La Liga-ah Athletic Bilbao (1-1) leh Champions League-ah Borussia Dortmund (1-1) draw zuiin, match thumnaah an chak ve ta.

Nizan khan Real Madrid leh Barcelona an inkhel a, El Clasico result hi he thu buatsaih a nih lai hian kan hre hman lo.

October 14, Zirtawpni Zan
Rayo Vallecano 0 - 0 Getafe

October 15, Pathianni Zan
Girona 1 - 1 Cadiz
GIR: Christhian Stuani 90+ 12' (P)
CAD: Álex Fernandez 46'

Valencia 2 - 2 Elche
VAL: Edinson Cavani 41' (P), 45+7'
ELC: Pere Milla 29' (P), 65'

Real Mallorca 0 - 1 Sevilla
SEV: Nemanja Gudelj 53'

Athletic Bilbao 0 - 1 Atletico Madrid
ATM: Antoine Griezmann 47'