Juve an chak hram

Dusan Vlahovic-a goal khat hmangin Juventus chuan Torino 1-0 in an hneh a, season hmang fuh lo tak Massimiliano Allegri naute tan Serie A inkhel pawimawha hnehna chan hi thil hlu tak a ni ngei ang.

Turin khawpuia inkhelah goal kan hmu har hle, minute 74-naah Vlahovic hian hnai tak aṭangin goal awmchhun a khung. Serbian player zingah Vlahovic hi Turin Derby-a goal khung thei hmasa ber a ni a, tun season kal laia league goal ruk a khungna a ni bawk.

Goal awmchhun khungtu Vlahovic chuan, "Derby a nih tawh chuan inkhel awlsam a ni ngai lo, a bik takin Torino hi team ṭha an nih avangin a harsa hle. Juventus chu kan beidawng ve ngai lo a, a tawp thlengin kan bei zel ang.

"Coach Allegri hi kawng engkimah kan thlawp, ani kaihhruaina hnuaiah hma kan sawn zel pawh ka ring. Club leh coah tan ka theihna 100% ka hlan zel ang," a ti a, an coach Allegri chu ban mai theih dinhmunah a ding tih a hria.

Juventus hian Serie A match 10 aṭangin point 16 an nei a, table-ah pasarihna an ni, an hnuaia awm Inter Milan chuan an khelh hmabakah hnehna an chang a nih chuan Old Lady hi an tlanpel leh nghal ang.

Italian manager Allegri chuan, "Inkhel hmuhnawm kan chhawp chhuak a, khatiang tur kha a ni. Player-te nen kan harsatna leh ṭhat tawk lohna laite kan sawi ho ṭhin a, chu chuan rah ṭha tak a chhuah ni pawhin ka hria.

"Kan match lehpekah Empoli kan tum dawn, kan khelmual a nih bawk avangin goal khat aia tam khung pawh kan tum ang," tiin a sawi a, season hmasa khan palina ni a, chumi aia sanga season khar theih ngei pawh a inbeisei.