Zaninah Chanmari Derby Chanmari West coach thar Zirtea
Mizoram Premier League-a Chanmari Derby pawimawh bera chhal ngam chu zanin dar 7:30 hian Lammualah khelh a ni dawn - semi final luh leh tlak theihna dinhmuna ding ve ve an ni!
Chanmari West FC-in result ṭha duhin H. Lalnunzira coach atan an lalut a, MPL champion lai Chanmari FC-in nomawi humhim ngei tumin Nigerian defender Emmanuel Chijioke Igwebuike an lalut ve bawk.
Coach thar Zirtea
Chanmari West FC-in match 9 aṭangin point 8 an hmu a, table mawngphahah an awm bawk avangin coach HC Zarzoliana thlak nan an veng tlangval H. Lalnunzira an lalut a, veng mipuiah nghawng a nei nghal ang.
Zirtea hi Aizawl FC hnuaiah coach hna chelh mekin tunah hian Aizawl DFA hnuaia first division khel Aizawl FC Football Academy-ah manager hna a chelh a, Rohmingthanga nen an thawk dun mek. I League club hian an club tana pawimawh Zirtea dilna ngai pawimawhin Chanmari West enkawl an phalsak a ni.
A inkhelh hun laiin Zirtea hi goal khung tura piang tiha sawi theih a ni a, mahni invawng ṭha leh chak ṭha a nih bakah goal hmaah a hriam bawk. CYMA Football 2012 -ah an veng Chanmari West chu final an thlen pui a, Armed Veng lakah chak zo lo mah se match zawng zawngah goal a khung vek a, he mi ṭum hian goal khung tam ber a ni a. NECS Cup khelh hmasak ber ṭum kum 2013-ah khan Zirtea hi top scorer a ni bawk.
Chanmari West tlangval Zirtea hi JCT Academy aṭanga inzir chhuak a ni a, Mizoram aiawhin age group inelna hrang hrang bakah Santosh Trophy thlengin a khel tawh a, MPL awm hmain Mizo club ṭha Dinthar FC, FC Kulikawn leh Luangmual FC tan a khel a, kum 2011 khan Aizawl FC zawmin 2013 thleng player angin a awm a, hemi zawh hian coach hna hi a ṭan a ni.
Zirtea hian Aizawl FC chu I League Under 16 leh Under 18-ah te a enkawl tawh a, kumina Mizoram Sub Junior team an champion khan assistant coach a ni.
Chona thar
Chanmari West coach thar H. Lalnunzira chuan, "MPL club hi ka enkawl mai ka ring lo a, hetia hun ṭha kan nei hi ka huphurh hle. Chutihrualin chona thar hmachhawn hi a châkawm a, veng tan theihtawp ka chhuah ang," tiin Vanglaini a hrilh.
Chanmari West tlangval Zirtea chuan, "Veng mipui pawh an phur vein ka hria a, anni tel lo chuan team enkawl hi a huphurhawm lehzual. Chanmari FC kan hmachhawn hunah pawh hian Chanmari West mipuiin ṭha taka min ṭawiawm ngei ka ring a, ka beisei bawk," tiin veng mipui chu inkhel en turin a sawm.
A vannei zawk
Chanmari FC-in phase 2-ah team ṭha pahnih an hmachhawn nghal a, Chhinga Veng leh Aizawl FC te an hneh loh zawn. Hei chauh hi a ni lo a, H. Vanlalthlanga hote hian match nga chhung chak hmel an hmu tawh lo a, West Warrior nen pawh hian 1-1 in an inhnehtawk.
Coach tawnhriat nei ṭha Thlanga chuan, "Theihtawp chhuah hi kan tih theih chu a ni mai a. Chhinga Veng leh Aizawl FC hi an mumal deuh a, team dang hi chu kan intluk tlang a ni. Chanmari West pawh hi team ṭha tak an ni a, a vannei zawk zawk kan chak ang," tiin point thum hmuh a harsat tur thu a sawi.
Chanmari FC defender C. Lalrosanga inhliam vangin a inlan thei dawn lo a, hei vang hian document pawimawh an tihfel hman chuan an defender thar Emmanuel Chijioke Igwebuike an chhawr nghal ang. MPL champion lai hian position hrang hrangah insiamṭhat an mamawh a, Pune City aṭanga an hawh forward Rani Ahammed Nigam chu tlarhma lamah mamawh chhanna a nih an beisei ang.
Vawiin Inkhel Tur
3:00 PM Aizawl FC Vs Bethlehem VT
7:30 PM Chanmari FC Vs Chanmari West