Goodison Park-ah Laipui vawi nga puak
Arsenal hmatawng pathum Alexis Sanchez, Mesut Ozil leh Alexandre Lacazette ten a vawi khat nan Premier League-ah inkhel bul an ṭan ho a, goal an khung vek. Arsene Wenger-a nauten Everton chu 5-2 in an hneh a, Gunners hian Toffees manager Ronald Koeman chu dinhmun derthawnga dah chungin Goodison Park an chuahsan.
Pathianni zan inkhelah Wayne Rooney goal khung chu chawlhlawk hma hretin defender Nacho Monreal-a'n a sut a, Mesut Ozil-a'n a lu hmangin an hmahruaina goal a khung zui. Idrissa Gueye chu Granit Xhaka a tihtluk vanga hnawhchhuah niin minute 20 chhung chu Everton lamin player 10-in an khel.
Watford laka tlawm hlim Arsenal lamin a tam zawk an nih chhawrin Alexandre Lacazette, Aaron Ramsey leh Sanchez ten goal an khung belh a, hun tawp dawnah keeper Petr Cech leh Monreal te ball inpek fuh tawk lo vangin substitute Oumar Niasse-a'n Everton goal hnihna a khung bawk.
Arsenal boss Arsene Wenger chuan, "Wayne Rooney-a'n goal a khung chiah khan kum 17 liam taah khan kan kir leh niah ka ngai," tiin kum 2002 kuma khatih laia kum 16 mi chauh Rooney-a'n Arsenal laka a goal khung a hriat chhuah thu a sawi.
Goal an chhuah hnuah Arsenal player an nguai lo a, tlarhma lamah Ozil leh Sanchez ten Lacazette te an hmuhnawn a, bench aṭangin Jack Wilshere tlan luhtir a ni bawk. England international midfielder Wilshere hian ram tana khel tlak a nih zia lantir nan Ramsey goal khung tur a siamsak - inkhel entu England manager Gareth Southgate-a'n a hmu chiang ang.
Arsenal hian Everton lakah vawi 95 hnehna an channa chiah a ni a, English club pahnih inhneh hnem ber niin, Gunners hian Toffees lakah goal 100 an khung tling ta a, club mal laka goal an khung hnem berna an ni bawk.
Everton manager Ronald Koeman-a'n inkhelh ṭan hmain a hma hun a chian loh thu a sawi tawh a, an chak lo zui avangin Dutch manager hi a hma hun tur sawi a harsa ta hle.
Ronald Koeman chuan, "Inthlak danglam kan ngai a, kan rilru puthmang a dik a ngai a ni. Kan chunga thil ṭha lo thleng tura ngaihna kan nei sa a nih chuan thil a dik thei tawh ngai lo," a ti.
Everton hian nipui transfer laiin sum an hmang hnem a, an beisei ang result erawh an nei thei rih lo. League match hnihah chiah hnehna an la chang a, point riat hmuin league table-ah 18-na an ni.