Liverpool lakah Harry Kane thlipui a tleh
Pathianni zan khan Wembley-in Premier League-a inkhel entu tam ber ṭum a tawng a, mipui 80,827 an pungkhawm - an stadium an sak ṭhat chhunga an khelmualah Tottenham Hotspur fans pungkhawm ten an duh ang tak result an hmu bawk a, an mikhual Liverpool chu 4-1 in an sawp.
Spurs tana lawmna tur dang chu Wembley-a an buaina a kiang ṭan anga a lang hi a ni. Season hmasaah an talbuai tawh a, tun season-a Wembley-a an league match hmasa pathumah hnehna an chang zo lo bawk. Tunah erawh Spurs-in Wembley-ah a zawnin hnehna an chang ta - Tottenham boss Mauricio Pochettino chuan, "Tunah chuan Wembley kan hmang thiam ṭan ta," tiin a hlim hle.
Tlarhnung buaina
Khawvela thil inhmeh thlang chhuak dawn ila, "Liverpool leh tlarhnung pherh" tih hi inhmeh ber zinga mi a ni hial tawh ang. Season hmasaa an chhiatna lai hi coach Jurgen Klopp-a'n a thawm ṭhat hna a thawh miau loh avangin a chhiat ngaiin a la chhe reng a, Reds ṭantute ti mangangtu a ni - Pathianni zan an chak loh chhan pawh a ni.
Spurs hian minute lina lekah an goal hmasa ber an khung a, Kieran Trippier-a'n Reds defender Dejan Lovren a chip khum hnuah Harry Kane-a'n ball a chang a, English striker hian ṭul loa lo tlan chhuak Simon Mignolet tlan helin goal hmahruai a khung. Minute riat hnu lawkah Lovren bawk a chesual nawn a, kar khata £100,000 hlawhtu defender hian Hugo Lloris long throw a tauh fuh thei lo - Kane-a bulah ball a tla a, ball a siam sak Son Heung-min tan goal-a chantir turin a harsa tawh lo.
A buai zel
Liverpool-in goal hnih an chhuah hnuah beidawn an tum lo - Jordan Henderson ball pek ṭha zet chu Mohamed Salah-a'n Spurs penalty area aṭangin goal kil sirah tak a khung. Klopp-a'n tho leh turin hun ṭha an nei tih a hria a, minute 31-na lekah Lovren la chhuakin Alex Oxlade-Chamberlain a dah lut. Mahse, goal khung belhtu chu Spurs an ni.
First half hun pek belha Christian Eriksen-a free kick pet chu Reds defender Joel Matip-a'n lo tauh chhuakin ball hi Dele Alli ke bulah ber kher a tla a, England international hian yard 18 vela hla aṭangin goal-ah a chantir. Second half-ah Liverpool an tho tawh lo a, buai nuaih karah Kane bawkin goal dang khung lehin Spurs an chak chiang. Liverpool hi an vanduai anga sawi theih a ni ve bawk a, Philippe Coutinho leh Salah ten an hun ṭha neih an chhawr lo - chutihruala hriat tur erawh goal li meuh chhuah tawh chuan 'vanduai' tia inthup mawi chu har tak tur a ni.
Klopp a lawm lo
Liverpool boss Jurgen Klopp chuan, "Goal li kha kan tihsual vanga lut vek a ni. Kan chetsualnaah mawhphurtu ka ni a, ka naute ka zirtir ṭha tawk lo pawh a ni mai thei. Mahni inrintawkna neih leh neih loh lam pawh a ni lo a, vawiina kan buaina chu 100%-in kan rilru kan pe lo. Kan tan chuan ni duhawm lo tak a ni, goal bula kan chetla kha en ula, awlsam taka chhuah tur chi a ni lo," a ti a, a naute khelh danah a lawm lo tih a hriat.
Reds hian tun season-a league match kua an khelhah goal 16 an chhuah tawh a, kum 1964-65 season hnuah an top flight league match hmasa pakua aṭanga goal an chhuah hnem ber ṭum a ni. Goal an chhuah 16 zinga 15 hi khualmuala an chhuah a ni a, Premier League club zingah tun season-a khualmuala goal chhuah hnem ber an ni mek. Simon Mignolet-a'n a chetsual vangin goal hnih a chhuah a, kum 2013-a Anfield a pan hnuah ama tihsual vang liau liauin league goal 13 a chhuah tawh - 2013 hnuah ani anga tihsual ngah Premier League keeper an la awm lo.