EFL Cup last 16 City, United leh Arsenal inlan dawn

Zaninah EFL Cup last 16 khelh a ni dawn a, Premier League club lian zingah Man­ches­ter City, Manchester United leh Arsenal an inlan dawn a, United-in Swansea City an lenchilh dawn avangin Jose Mourinho-a naute hmabak hi a hautak berah ngaih a ni.

Friendly match 'lo deuh'

Manchester United-in Pre­mier League-a an match hnu­hnung berah rin loh takin Huddersfield Town an ngam lo a, khualmualah 2-1 in an tlawm. United hi an zin chauh vangah a ngaih theih a, Liverpool leh Benfica a zawna an lenchilh hnuah Huddersfield khelmual an pan - zaninah Jose Mou­rinho-a'n player khel khat deuh a hmang a nih pawhin a mak lo ang.

Portuguese manager hian Huddersfield an hneh loh hnu lawkah, "Friendly match ai pawhin kan rilru puthmang a dik lo zawk," tiin a naute a sawisel a, zaninah a naute lakah a beiseina a sang dawn.

City = goal

Manchester City-in Premier League lamah goal khung an thiam tih an pholang tawh a, goal 32 an khung. Pep Guardiola naute hian EFL Cup lamah goal khung dan an theihnghilh thut a rinawm loh a, an lenchilh tur Wolverhampton Wanderers tlar­hnung lam tan hna a hautak dawn.

City tan chhawr rim hlawh lo Raheem Sterling, Ilkay Gundogan, Yaya Toure leh Eliaquim Mangala te ho an inlan a rinawm.

Norwich hmaah laipui

Everton lakah goal chhuah hma­sa zet mah se Arsenal-in vawi nga ngawt laipui an kap puak a, an mikhual tur Norwich City lakah ṭhat chhuah an tum lo ang. Gunners boss Arsene Wenger-a'n Europa League leh Premier League-ah a player-te a ring ngam vek tih a lantir tawh a, zanina a naute a rem dan tur rinthiam a harsa.

Toffees lakah a vawi khat nan Alexis Sanchez, Alexandre Lacazette leh Mesut Ozil an khel ho - Norwich tana thu hriat nuam awmchhun ni tur chu anni pathum hi hah chawlhtir an nih a rinawm.

Zanin Inkhel Tur
AFC Bournemouth 12:15 AM Middlesbrough
Arsenal 12:15 AM Norwich City
Bristol City 12:15 AM Crystal Palace
Leicester City 12:15 AM Leeds United
Swansea City 12:15 AM Manchester United
Manchester City 12:30 AM Wolverhampton
October 25, Nilai zan
Chelsea 12:15 AM Everton
Tottenham Hotspur 12:30 AM West Ham United