Bsa hnuaiah Police tan thilmak a thleng
Mizoram Police-in nimin tlai khan Ramhlun North 3-2 in an hneh a, Mizoram Premier League Season 6-ah pahnihna an ni ta.
Lalbiaksanga Colney-in Police a enkawl hnuah match nga an khel tawh a, vawi li chakin vawi khat an inhnehtawk. Police hian point 14 hmuin pahnihnaah an awm a, inkhel dang result a zirin la tlahniam thei ni mah se BS-a enkawl ṭantirh a table mawngphaha awm team tan chuan an thlen chin hi a ropui a ni.
One - One
Mizoram Police-in Lalbiakhlua hmangin minute 15-naah goal an khung a, goal luh theih nan Electric Veng tlangval Lalfakawma a thawh hlawk hle.
Police defender B. Zoramthanga'n freekick aṭanga ball vawrhluh chu Fakawma'n tauhin Ramhlun North keeper Liansangpuia'n a dang per a, Fakawma'n pet nawn lehin chumi per chu Biaktea'n a khung.
Ramhlun North-in si an phurh hnuah an khel ṭha zawk a, goal hmaah an hriam tawk lo. Khelmuala nung ber Lalrinfela corner pet chu vengtu nei lo Rosangliana'n a tauh lut a, first half a tawp nghal bawk.
Chakna Biaktea
Mizoram Police-in chak tumin inhliam vanga bul ṭan lo F. Lalrinpuia chu second half-ah an luhtir nghal a, Ramhlun North phurna a reh phah lo.
Samson Ramengmawia naute chungnung hretin Khawlailung tlangval Rinfela cross Lalremruata tauh luh loh chu an chance neih ṭhat ber a ni.
Amaherawhchu, Police danglamna a lang a, minute 79-naah Lalfakzuala cross chu Biaktea'n a tauh goal. Police ṭantute thawm a ring a, khelmualah player phur chhunzawmin Valpuia siam sak chu minute 87-naah Sangbera'n a khung.
Police an inthlahdah hma hret a, Lalliansanga'n (Notea) beiseina siam turin minute 90-naah Ramhlun North goal hnihna a khung. Police buai zui mah se a tawp thlengin an ṭang tluan a, point thum hlu tak an hlawh chhuak.
ZoFooty Statistics
Ramhlun North 2 - 3 Mizoram Police
RNFC : Rosangliana 45+2'; Lalliansanga 90'
MPFC : Lalbiakhlua 15', 79'; Lalsangbera 87'
MoM : Lalbiakhlua, MPFC
55% Ball Possession 45%
19(10) Shots (On Target) 12(8)
0 Yellow Card 2
0 Red Card 0
Powered by Rainbow Multibrand Mobile Showroom