Garbine Muguruza a chak nghal

Hmeichhe tennis thiam zual pariat inelna WTA Finals 2017 chu Pathianni zan khan khelh ṭan a ni a, Wimbledon champion Garbine Mu­gu­ruza chuan a match hmasa berah French Open champion lai Jelena Ostapenko chu straight set-in a hneh nghal.

Singapore-a inkhelah Grand Slam vawi hnih champion tawh Mu­guruza hian Latvian nula Ostapenko lakah hian darkar khat leh minute 25 chhungin 6-3, 6-4 in hnehna a chang. Spanish star Muguruza tan kumin hi a zawna WTA Finals vawi thum a khelhna chiah a ni.

Simona Halep laka world number 1 nihna hloh hlim Muguruza chuan, "Ostapenko khan ball a vaw na em em a, ka tan player hmachhawn harsa tak a ni. Hnehna ka chan avangin ka lawm a, tihsual ka nei hnem erawh ka insiamṭhat a ngai," tiin a sawi.

Inkhel dangah world number 3 Karolina Plis­kova chuan Venus Wil­liams lakah 6-2, 6-2 in hnehna a chang. Kum 37 mi Venus hi tun tournament chhunga player upa ber a ni a, WTA Finals khel phak tawh player zingah ani aia upa pahnih chiah an la awm bawk.

Tun season-ah nau a neih avangin Serena Williams chu Australian Open hnuah a la inkhel leh lo a, hmeichhe pla­yer zingah number 1 nihna hauh rei fal thei an awm lo. WTA Finals-a inlan player pariat zinga pasarihte hi chuan nomawi an chawi a nih chuan number 1 ni­chunga season khar thei din­hmunah an ding vek a ni.