FIFA U17 World Cup ; Semifinal lut a hriat kim ta

FIFA Under 17 World Cup hmawr an bawk hnai ta - Inrinni zan inkhelah Mali leh England-in semifinal an lut tawh a, Pathianni zan khan Spain leh Brazil-in a thiam pali zinga tel turin 'ticket' an lei ve leh ta.

Pathianni zana mipui ngaihven hlawh inkhel pahnihah Spain leh Brazil-in hnehna an chang ve ve. Spain hian Iran chu 3-1 in an sawp a, Brazil chuan 2-1 in Germany an hneh bawk. Semifinal hi Nilainiah khelh tur a ni dawn a, Brazil leh England inhmachhawnin Spain leh Mali an inkhel bawk ang.

Ruiz = goal

Spain tan captain Abel Ruiz bawkin goal a khung leh ta a, group stage-a Germany sawptu Iran lakah 3-1 in a team-te hnehna a chanpui. Barcelona forward hian minute 13-na lekah goal hmahruai a khung a, Spain tan Cesar Gelabert chuan hun ṭha neih chhunzawm mah se Iran goalkeeper Gholam Zadeh chuan ṭha zetin a dan sak.

Goal dang lut loin chawlhlawk hman a ni a, second half khelh a nih hnuah goal a sur thung. Minute 60-naah Sergio Gomez chuan goal ropui a khung a, Gomez goal khung tur siamsaktu Ferran Torres chuan minute sarih hnu lawkah a chhunzawm zui ve bawk. Iran beiseina siamsak turin Saeid Karimi chuan an goal thumna an chhuah aṭanga minute thum hnu lawkah goal khat khung ve mah se awmzia a awm hman tawh lo a, Asia khawmualpuiin inelna a thlen ṭumah a thiam pali zinga thawh tur team a nei ta lo.

Brazil an hmuhnawm

Germany-in Brazil lakah penalty hmangin goal hmahruai khung mah se Brazil-in tlawm an duh lo a, second half-ah comeback lantirin hnehna an chang. South American team hi hun

ṭha nei hmasa zawk an ni a, mah se Alan chuan an chance neih hi bar pet per nan a hmang. An thin phu tih rana a awm hnu lawkah Germany an harh a, penalty an hlawh chhuak. Lucas Halter chuan John Yeboah a tih tluk avangin penalty a chawi - Germany tan a pet turin captain Jann-Fiete Arp a lo pen chhuak a, Hamburg striker hian tun inelnaa a goal ngana ni turin a khung.

Team ṭha Germany lakah Brazil-in si phur mah se tlawm mai an tum lo. Huaisen takin an beih chhunzawm a, minute 71-naah an huaisen rah an seng chhunzawm - substitute Weverson chuan kawh pawta pet chungin an si phurh a sut a, minute ruk hnuah Paulinho chuan tun inelnaa a goal thumna ni turin a khung chhunzawm ve bawk. Goal khung hmasatu Germany an talbuai a, Brazil-in hnehna an chang.

Quarterfinal Results
October 22, Pathianni Zan
Spain 3 - 1 Iran
Germany 1 - 2 Brazil

Semifinal Fixtures
October 25, Nilaini Zan
Brazil 5:00 PM England
Mali 8:00 PM Spain