Paris St-Germain chak zo lo

Neymar hnawhchhuah a nih ṭumin hun tawp hma chiaha Edinson Cavani goal khung hmangin Paris St-Germain chuan Marseille chu 2-2 in an inhnehtawkpui hram a, point 26 hmuin hma an la hruai chhunzawm a, pahnihna AS Monaco aiin point liin an sang zawk.

Pathianni zan French Ligue 1 inkhelah midfielder Luiz Gustavo-a'n yard 30-a hla aṭangin Marseille tan goal hmahruai a khung a, chawlhlawk hmain pound maktaduai 200 man Neymar chuan a goal 10-na khungin an si phurh a sut.

Inkhel inhnehtawk takah PSG an chungnung bik lo a, mualneitu lamin hun tawp hma minute 10 chiah a awm tawh tihah Florian Thauvin hmangin a vawi hnih nan hma an hruai nawn. Goal mamawh PSG an buai, Barcelona forward hlui Neymar chu yellow card vawi hnih hmuh vangin hnawhchhuah a ni.

League hmahruaitu PSG hi khualmualah an tlawm ngei dawn niin a lang hman. Mahse, hun tawp hma chiahin yard 25-a hlaah freekick an hmu a, Uruguay international Cavani-a'n tun season chhunga a goal 13 nana khungin an si phurh a sut zo a, hun a tawp zui nghal.

Inkhel dangah Manchester United winger hlui Memphis Depay chuan a club tana a hattrick hmasa ber siamin Lyon chuan Troyes 5-0 in an sawp a, league table-ah palinaah an invawrh chho.

Paris Saint-Germain head coach Unai Emery chuan, "Kan khingpui player te khan Neymar kha an tibuai nasa in a lakah an foul hnem hle a, referee khan ṭha takin a veng turah ka ngai zawk. Mihring ve tho a ni a, an bei nasa lutuk kha atan insum reng a harsa ve a ni," tiin a player a chhan hle.