Juventus chakna Khedira

Sami Khedira chuan football a khelh hnua a vawi khat nan hattrick a siam. Pathianni zan Serie A inkhelah champion lai Juventus chuan Udinese 6-2 in an luhchhuah.

Juve midfielder Kedira-a'n goal thum a khung bakah Daniele Rugani leh Miralem Pjanic ten goal khat ve ve an khung a; Samir-a'n anmahni lamah a ti lut palh bawk. Inrinni zanah Napoli-in tun season chhunga a vawi khat nan point an hloh a, an hruaina a nghet lo sawt. Juve chungah hian Inter Milan (23 points) leh Napoli (25 points) te an awm.

Turin club manager Massimiliano Allegri chuan, "Atalanta leh Lazio lakah match hautak zet kan khel a, tun hnaiah khel ṭha viau chungin point thum kan hmu lo fo, tun ṭumah erawh kan duh leh mamawh ang takin kan khel chhuak thei ta a ni," tiin a sawi.

Pathianni zan inkhel dangah AC Milan defender Leonardo Bonucci chu hnawhchhuah niin Milan leh Genoa te chu goal awm loin an inhnehtawk - Italy international Bonucci hi tun hnai kum nga chhunga hnawhchhuah a nih vawi khatna a ni.

Juventus defender hlui Bonucci hi Aleandro Rosi a nghawk avangin minute 25-naah hnawhchhuah a ni a, October 28 zana a club hlui Juve nen an inhmachhawn hunah a inlan thei lo ang.