Atletico-in ngamtu an la tawng lo

Spanish La Liga khelh mekah Atletico Madrid chuan ngamtu an tawng lo tluang zel - Diego Simeone-a naute hian Celta Vigo chu 1-0 in an hneh a, Kevin Gameiro chuan goal awmchhun hi a khung.

Pathianni zana team lian inkhel dangah Real Madrid chuan hnehna an chang ve bawk a, an mikhual Eibar chu 3-0 in an sawp. Real tan Eibar defender Paulo Oliveira chuan an lama a tauh luh bakah Marco Asensio leh Marcelo-ten goal khat ve ve an khung bawk a, hun pumin khel mah se Ronaldo chuan goal a khung lo.

Atletico an vannei

Celta Vigo khelmuala inkhelah Atletico tan Gameiro chuan minute 28-na lekah goal hmahruai a khung a, Celta tlarhnungin Saul Niguez corner an petchhuah theih loh hnuah French striker hian hnai set sawt aṭangin a khung - Sevilla striker hlui hian La Liga-ah goal 52 ngawt a khung ta a, French player zingah La Liga-a goal khung tam lama a tluk loh awmchhun chu Karim Benzema (123) leh Antoine Griezmann (102) te chiah an ni.

Atletico an mikhual zanah Celta an vanduai ve bawk a, an hun ṭha neih goal-ah an chantir thei lo. Liverpool striker hlui Iago Aspas chuan freekick aṭangin bar a pet per a, Jan Oblak chuan John Guidetti goal shot chu ṭha zetin a dan sak bawk.

Real an chak

Santiago Bernabeu-a inkhelah Marco Asensio ball cross chu Paulo Oliveira chuan minute 18-na lekah an lamah a tauh lut a, Asensio hian minute 28-naah an goal hnihna a khung chhunzawm bawk. Real tan Isco leh Cristiano Ronaldo-ten hun ṭha neih chhunzawm mah se goal-ah an chantir thei lo a, Marcelo chuan Karim Benzema nen an in one-two hnuah an goal thumna a khung bawk.

Tun season La Liga-ah Ronaldo-a'n goal khat chiah a la khung a, Eibar lakah pawh a nil leh ta. Mahse, Real coach Zinedine Zidane chuan a nau hi chhan tlatin, "Cristiano-a'n goal a khung loh vang mai hian lungphanna tur awmin ka hre lo. A pawimawh ber chu chance a insiam kha a ni," tiin a nau chuan chance a insiam reng avangin goal a la khung ngei tur thu a sawi.