Liverpool fan-te lawmna ni - a lo her chhuak ta!

Community Shield nomawi an chawi hnua nui khat tak Liverpool fan-te chu hlim takin an nui ve leh ta - Pathianni zan khan Manchester City chu 1-0 in an hneh a, Mohamed Salah chuan goal awmchhun a khung.

Liverpool tan league match kua an khelha an vawi thum chak vena chauh a ni a, hmahruaitu Arsenal chu point 14 zetin an la thlau tho - match khatin an khel tlem zawk tih erawh hriat a ṭha.

Anfield-a inkhel boruak 'hot' takah hnehna an chan avangin Reds fan-ten beiseina thar an nei ve leh a, an ṭhat dan bera an khelhchhuah theih phawt chuan eng team pawh hneh turin an ṭha tawk tih a lang.

City erawh an tlawm avangin point 23 an nei a, Tottenham Hotspur nen an point hmuh zat a inang - hmahruaitu Arsenal an thlauhna chu point li a ni a, Premier League a ngaihnawm tual tual.

Hei le Liverpool
City boss Pep Guardiola-a'n inkhelh hmain Liverpool a fak a, Jurgen Klopp-a naute hian tun hnaiah beisei phak lo mah se, "Nomawi chawi tura kan elpui ber an la ni reng," a ti a, Arsenal tan ngaihthlak a nuam lo mai thei.

Mahse, hliamin a tihbuai Reds hian an ṭhat dan berin City an mikhual thei lo - Joel Matip inhliam hnuah Ibrahima Konate inhliam thu hriat a ni ve leh a, inkhel khat tak Joe Gomez-a'n centre back-ah Virgil van Dijk a kawp a ṭul.

Trent John Alexander-Arnold pawh hliam vangin a inlan thei lo a, a aia lut chu kum 36 mi James Milner a ni - Liverpool fan-ten hlauthawng takin inkhel an thlir.

Mahse, "Ka dil loh zawk malsawmna" tih ang maiin Reds tana player langsar chu Gomez leh Milner an ni a, tlarhnungah player pahnih an thawkrim a, an khel ṭha takzet - Liverpool goal chhuah loh chhan langsar an ni.

Cho leh cho
Anfield-a inkhel an nih avangin Liverpool-in City an hlau lo a, City-in Reds hlauh an tum bik lo - Erling Haaland-a'n tun season-ah match hnih chiah goal emaw assist neih lohna a nei a, hei hi Liverpool a hmachhawn ṭuma thleng ve ve a ni.

Norwegian striker hian chance nei lo tawp a ni lo - mahse, a hun ṭha neih chu Alisson-a'n a dansak ve ve a, tukkhum dawm chunga, ui taka thlir liam mai loh chu tih theih a nei lo.

Minute 76-naah goal kan hmu ta nge nge - Joao Cancelo a chesual a, Alisson-a ball thlawh chhuah chu a lo dan ṭhelh avangin Salah ke bulah a tla a, Egyptian forward hian harsatna nei loin goal-ah a chantir.

Salah hian hetiang deuh chiah hian a hma lawkin chance a nei tawh a, mahse, City keeper Ederson chu a hun takah tlan chhuakin a kutin ball a tawk thawi hman - a vawi hnihnaah erawh a vannei nawn ta lo.

Arsenal lawmna
Liverpool-in hnehna an chan avangin Gunners-in lawm takin kut an beng a, nomawi chawi tura an elpui City chu Reds hian an pawh hnunsakah an ngai a, an lawmna hi a awm lo hran lo.

Mahse, hei erawh hriat a ṭha - October chauh a la ni, tih hi! Season kar laka World Cup awm tur hian thui takin team a la nghawng ang tih a lang a, Arsenal hian an hriat loh karin champion tura an elpui tur chak hi an lo lawmpui thei tlat!

Rangers laka hattrick siamtu Salah-a'n a thiam a la theihnghilh lo tih a lang nawn leh ta a, game boruak sangah talbuai loin goal a khung - tun hnaia Reds chet chhiat chhan langsar tak VVD pawhin ngai a awh leh ṭan tawh.

Bench aṭanga luhtir Darwin Nunez-a'n hmasial loh hret a zir a ṭul a, Uruguayan striker hian a ṭhiante duhsakna chang hria se chuan Liverpool hi goal khat aia tam zawka chak thei an ni - Engpawhnise, Liverpool fans lawm phawt mai teh u!

Thil thleng langsar
24' Thiago Alcantara ball pek chu Diogo Jota-a'n Milner a pe a, Milner hian ṭha zetin cross zui mah se Ederson chuan a lo dang per - a per lehlam hi Andy Robertson chuan pet mah se uiawm takin a thlawh over.
40' Kevin De Bruyne ball pek ṭha zet chu Haaland chuan lo tauh mah se Alisson-a'n harsatna nei loin a lo dang a, hlauhawm a awm lo.
50' Roberto Firmino-a'n Salah tan ṭha lutukin a siamsak a, Egyptian forward hian a khung ngei dawn nia a lan laiin a hun taka rawn tlan chhuak Ederson-a'n a kut hmawrin a dang a, City an him.
55' KDB-a ball siamsak chu Haaland-a'n a um lut a, Alisson nen an inchuhna lama ball per chu Phil Foden chuan goal-ah a chantir - mahse, he thil thlen hma hian Haaland chu Fabinho lakah a foul a, video assistant referee hmanga ennawn a nih hnuah goal hi pawm a ni lo.
56' Liverpool-in chance an nei zui a, mahse, Salah-a siamsak chu Jota chuan uiawm takin goal bar chungah a tauh.
64' Ilkay Gundogan-a siamsak chu Haaland chuan goal zawnah pet mah se Alisson a ding miau a, Brazilian keeper hian ṭha zetin a dang.
70' Mual ding lam aṭangin Salah-a'n ball a lalut a, mahse, a ke veilama pet luh a tum chu uiawm takin a hlah.
76' GOAL KDB freekick pet chhe zet a man hnuah Alisson-a'n Salah a hmu a, na zetin ball a thlawh lut, Cancelo-a'n Salah veng mah se a chetsual bakah a veng hneh lo a, Ederson chiah hmachhawn chungin Salah-a'n awlsam takin goal-ah a chantir.
77' Darwin Nunez-a'n Henderson-a siamsak aṭangin chance a nei a, a bulah Salah pek tur awm mah se mahnia pet a thlang a, a goal lo.
85' Bernardo Silva-a'n Salah a pawt thlu a, freekick hmuh beiseitu Jurgen Klopp-a'n a lawm lohna a tilang nasa hret a, red card pek a ni.
90+6' Nunez-a'n Ederson chiah hmachhawn chungin goal khungna remchang a nei a, mahse, a hun ṭha neih a chhawr lo.

Red card kha chu ka thiam loh a ni a, mahse, midang ka zah lohna erawh ka hmu lo. Thil thlen dan ka thlirlet a, kum 55 mi ni tawh chunga ka chet dan khan red card chu a phu a, ka inthunun zo lo a, a pawi ka ti. Mahse, chhuanlam tlem siam ka duh a, engtinnge Salah chunga thil thleng kha foul a nih loh theih le? Kan theihtawp piahlam thlenga kan chhuah a ṭul a, chutiang tak chuan kan ti. Kan tlarhnung a nghet a, a hun takah kar awl hnawh khatin a hunah tak kan che zel a, khati chung khan City chuan chance an nei tho a ni. - Jurgen Klopp, Liverpool boss

Referee khan ka assistant leh Jurgen a titipui a, a chiang viau a nih loh chuan foul a ham loh tur thu a sawi. Engtiklai pawh khan 'play on' a ni reng a ni ber a, mahse, kan goal khungah erawh a ni leh si lo - khata ṭang khan 'play on' kha a uar leh ta vak lo a ni. Kha vanga tlawm erawh kan ni lo. Kha goal kha pawm ta se, eng nge thleng dawn, tuman kan sawi thei lo - mahse, khatihlai khan game kan thunun a, a hnuah kan tihsual vangin kan talbuai zui. Hei hi inzir nan kan hmang ang. Kan khelh danah erawh ka naute ka chhuang takzet. Liverpool kha an au nasa a nih chuan kan au ve mai tur a ni a, an tlan tam a nih chuan kan ti ve mai tur a ni. Chutiang a nih loh chuan Anfield-ah hi chuan a harsa ṭhin. - Pep Guardiola, City manager