NE Zone champion Mizoram

2nd Junior National Basketball Championship North East Zone-ah Mizoram an champion. Basketball Federation of India buatsaih inelnaah hian Mizoramin an elpui zawng zawng an sawp vek a, tuma tluk rual lohin an chungnung hle.

Nimin khan Mizoram hian Shillong, Meghalaya-ah an match hnuhnung ber an khel a, an khingpui Nagaland chu 76-30 in an hneh. Ngaland hma hian, Assam, Manipur, Arunachal Pradesh leh Meghalaya te an hneh vek bawk.

Mizoram coach H. Lalhruaitluanga chuan, "A nihna takah chuan North East Zone hi chu inelna hautak tak a ni lem lo, kan elpui state dang ten min tluk lo ve hlein ka hria. Kan tana fiahna chu India state ṭha dangte nen kan inel hunah a ni ang," tiin Vanglaini a hrilh.

India rama junior team te ineIna lian hi zone panga - North Zone, South Zone, East Zone, West Zone leh North East Zone ah te khelh a ni a, zone tin hian tun thla chhungin a huam chhung bikah inelna an nei zo vek ang.

East Zone inelnaah hian state paruk an inel. Zone tin aṭanga ti ṭha team pathum leh a thleng tu team te nen an vaiin team16 in Junior National Basketball Championship an khel dawn.

Ruahman dan chuan India ram huap inelna hi December 21 – 28, 2022 hian Karnataka-ah khelh a ni ang. Mahse, ruahmanna hmasa hi tihdanglam leh theih a la nih thu Vanglaini chuan kan dawng.

Mizoram team hian nizan khan Shillong chhuahsanin Aizawl an rawn pan a ni.