Arsenal an kal fal ta

Premier League hmahruaitu Arsenal chuan hlauthawng deuh tak chungin Leeds United 1-0 in an hneh a, inkhel dangah champion lai Manchester City chu Liverpool lakah an tlawm - Gunners tan chuan result ṭha a ni.

Pathianni zan Elland Road-a inkhelah Bukayo Saka chuan goal awmchhun a khung. Inkhel tir lam leh a tawp lamah video assistant referee (VAR) chuan sawi zui a hlawh leh viau, lawm leh lawm lo an awm.

Power supply chiang lo vangin referee Chris Kavanagh-a'n VAR lam a be pawp thei lo a, goalline technology a hman theih loh bawk. Inbiak pawhna a ṭhat loh thu hi team pahnih manager hrilh an ni a, inkhel hi an titawp lailawk; minute 40 hnuah an khel chhunzawm leh thei chauh.

Chawlhlawk hma deuhin Leeds forward Rodrigo-a'n ngaihtuah thui lo takin ball a pet pawp a, a sawt kang chu Saka-a'n a bula awm Martin Odegaard tan a tauh thla. Arsenal captain hian Saka tan a lir zui nghal a, sir kil deuh tak aṭangin goal pawimawh a khung.

Tun hnaia result nei ṭha lo, a zawna match ruk chhung chak ni hmel hmu tawh lo Leeds lamin thawhleh tumin na takin an bei let. Luis Sinisterra-a shot chu defender Gabriel-a'n a lo dansak a, keeper Aaron Ramsdale pawhin Brenden Aaronson khung tur a dang bawk.

Leeds striker Patrick Bamford rawn luh hnuah boruak a nung zual. William Saliba-a'n a kutin ball a khawih a, penalty pek a ni. Mahse, English player Bamford hian goal zawnah a pet lo, keeper Ramsdale-a'n a zuan dik bawk avangin goal zawn pawh ni se a lut loin a rinawm.

Hun tawp dawnah Bamford hi box chhungah a tlu, penalty a hlawh bakah amah titlutu Gabriel chu hnawhchhuah nghal a ni. Thil thlen danah Arsenal an lawm lo, nasa takin an sawisel.

Referee Chris Kavanagh-a'n khelmual sira VAR a en a, thil thleng a endik hnuah Bamford chuan Gabriel a titlu hmasa tih a hmu. Penalty a pek tawh chu a sut leh a, red card a phawrh tawh pawh a hnukkir.

Arsenal tan point thum hlu tak a ni a, chak lo Leeds tan erawh an mangchhia aṭanga thawh harh an tumna chu a la hlawhchham tluang zel. An match lehpekah anmahni ang bawka talbuai Leicester City an tum dawn, point hmuh ngei an beisei tawh dawn a ni.

Mikel Arteta naute hian Premier League match 10 an khelh aṭangin vawi kua hnehna an chang ta, pahnihna Man City aiin point liin an sang zawk mek. Khelh hmabak 26 an la nei. Favang chauh a la ni a, thlasik leh ṭhal boruakin a la nuai vel dawn - Arsenal tan fiahna a ni zel ang.