Referee-te hi inenfiah ve teh se - Venghnuai coach

Honda MPL9-ah vawiin tlai dar 4:00 hian Mizoram Police leh FC Venghnuai an inkhel dawn. Team pahnih hi round 5-ah khan an inkhel tawh a, Venghnuai hian 1-0 in hnehna an chang.

Venghnuai hian Police hi hneh tawh mah se an match hnuhnung berah Aizawl FC lakah goal khata hma an hruai hnuah an tlawm a, hmahruaina hun ṭha an bawhpelh. I League club hian penalty hmangin goal hnih an khung a, referee thutluknaah Venghnuai an lawm thei lo. Coach Rindika Hmar chuan, "Referee-te hi inenfiah ve teh se," tiin inkhel enkawltu match official-ten hmasawn an mamawh thu a sawi.

Police pawhin Aizawl FC hnaih theihna hun ṭha an bawhpelh tho a, match hnuhnung berah Chanmari FC nen an inhnehtawk. Coach Lalbiaksanga Colney hote hi first half-ah an khelh ṭhat loh avangin CFC laka point khat an hmu hi result ṭha a ni a, chutihrualin FC Venghnuai lakah hian chak ngei an tum tawh ang.

I Day Football semifinal-ah khan Police hian Venghnuai hi penalty shootout hmangin an hneh tawh a, tun season-ah vawi khat ve ve ve an chak. Vawiin tlaia an inkhel tur hi a pawimawh dawn a, inkhel entu pawh an ṭhahnem ang.