El Clasico - Real tan Barca an la nau

European football-a inkhel ngaihven hlawh ber pawl El Clasico chu Pathianni zan khan khelh a ni ta ngei a, Real Madrid chuan Barcelona chu an mang ram aṭanga beng harhin, a tak ram an temtir a, 3-1 in an hneh.

Real tan Karim Benzema, Federico Valverde leh Rodrygo (penalty) ten goal khat ṭheuh an khung a, Barca tana Ferran Torres-a goal khung ve chu mualpho zualpui khuhna chauh a ni.

Xavi-a'n Barcelona a enkawl hnua khualmuala La Liga match-a an tlawm hmasak ber a ni a, Champions League-ah dinhmun derthawng taka an awm bawk avangin Barca tan khuangchawi thlaah meuh pawh lunglen hla a sak hleihtheih loh!

Real-in Barca ngama hnehna an chan avangin table chung ber an luah leh ta a, an hnuaiah Barcelona an awm - match kua ve ve khelh tawha team pahnih inthlauhna chu point thum a ni.

Lewy aiah Benzema
Tun season El Clasico khelh a nih hmaa sawi hlawh tak chu European football-a striker ṭha pahnih, Karim Benzema leh Robert Lewandowski intawng tur chu a ni a, El Clasico-a an intawn hmasak berah Benzema a chungnung zawk.

French striker hian tun season-ah hliam vangin goal khung tam tawk lo mah se a thiam a la theihnghilh lo tih a pholang a, minute 12-na lekah goal hmahruai a khung - a goal khung pakhat chu offside vangin pawmsak a ni lo thung.

Benzema ang thoa kum 34 mi Robert Lewandowski-a'n goal khungna remchang nei ve tho mah se a chhawr thei lo a, hnai set sawt aṭangin goal ruakah a tlawh lut lo a, holam takin freekick a hlah bawk.

La Liga match kua aṭanga goal kua khungtu Lewandowski-a'n hun pawimawhah goal a khung lo a, league match ruk aṭanga goal li khung tawh Benzema aiin El Clasico-ah chuan a chungnung lo zawk.

Real an ṭha
Benzema-a'n goal a khung hnuah Lewy-a'n si phurh sutna remchang a khung a, Real-in Barca an hrem nghal - Valverde chuan yard 20 vela hla aṭangin a chhuih goal a, El Clasico ang 'level' a goal duhthusam a ni.

Minute 83-naah goal khung thei lo Lewy a inlar a, Ansu Fati ball pek chu Torres tan a kheng a, Manchester City forward hlui hian harsatna nei loin goal-ah a chantir - beiseina thar an nei.

Mahse, hun tawp nan minute hnih chiah a awm tawh tihah Eric García a chesual a, Rodrygo lakah a foul - video assistant rawn a nih hnuah referee-in penalty spot a kawk a, Santiago Bernabeu thawm chu ṭha tak a ni.

Real tan penalty pet turin Rodrygo a lo pen chhuak a, harsatna nei loin goal-ah a chantir - hun tawp thlengin goal dang a lut tawh lo a, 3-1 in Real an chungnung zawk.

Barca an buai
Season hmasa khan Santiago Bernabeu-ah Barcelona-in Real Madrid chu 4-0 zetin an sawp a, Barca thuneituten Xavi an rin ngam lehzualna chhan a ni a, club share ṭhenkhat meuh hralh chunga nipui transfer-a sum tam tak an pek ngam chhan a ni.

Barca hian club television rights leh thil dang share an hralh lawk khan, league leh Champions League-a result neih ṭhat an beisei vang a ni a, khelmual chhunga an chet ṭhat phawt chuan sum luh belh tur a awm zel dawn tih an hria.

Mahse, Krismas pawh a thlen hma emin Barca an talbuai - Champions League group stage aṭangin tla thei dinhmunah an ding mek a, midang kutah an innghat tawh. La Liga-ah an elpui ber an ngam lo leh ta bawk.

Barca inkhel en chuan naupang rual, Torres, Gavi leh Ansu Fati te luh hnuah an khel ṭha sawt tih a lang a, he lai pawh hi Xavi tan rilru sen tharna tur niin a lang.

Table-a hmahruaitu ni zel turin hun ṭha kan nei a, mahse, kut ruakin kan haw a ni. Draw result neihna chance pawh kan nei a, mahse, kan hun neih kan chhawr lo.
Hrehawm ka tiin a hrilh hai thlak a, kan huaisen tur angin kan huaisen tawk lo.Tlarhnung a phui tawk lo a, insiamrem kan harsat bawk. Kan khel ṭha lo a, chance erawh ka nei tho - kim lo tam tak a awm a, kan inenfiah a ngai. - Xavi, Barca boss

First half-a kan tih ṭhat kan chhawr a ni - min nawrna dangchat chungin, tlarhnung aṭangin kan tal chhuak thei zel a ni. Tlarhnung a phui a, hmun awl kan pe meuh lo a, goal hmaah kan hriam em em bawk. Inkhelh chhung zawngin first half ang khan a awm reng theih loh - mahse, game erawh kan thunun hle. Second half-ah min rawn nawr na ve deuh a, keini pawh kan nghing ve zeuh nachungin chuti takin kan tuar lo.
- Carlo Ancelotti, Real Madrid coach