Gijon Open champion Rublev

Andrey Rublev chuan Sebastian Korda chu 6-2, 6-3 a hnehin Gijon Open champion a ni. Russian tlangval hian tennis season kal laiah title pali a lakna a ni nghal, duhthusama ṭhain kum hmang lo mah se a tawp khar ṭhat a la tum hle.

Kum 24 mi Rublev hi seeded pakhatna pek a ni a, a champion theih nan hian a kalkawngah Ilya Ivashka, Tommy Paul leh US Open 2020 champion Dominic Thiem te a hneh, tournament a khel chhe lo hle a ni.

Tennis a khelh hun chhunga nomawi 12 chawi tawhtu Rublev chuan, "Ka khingpui Korda kha kum 22 mi chauh a la ni a, hmabak eng tak a nei in ka hria. Tharum a ngah a, a ball vuak a dik hle bawk.

"Tun inelna hi ka tan chuan a hlu, kan ram buaina vangin tournament ṭhenkhat kan khel ve thei lo, chutiang kara hlawhtlinna ka chang ve leh hlauh hi lawmna tur a ni," tiin a sawi a, season tawpa neih tur ATP Finals khelh phak ngei a tum.

Rublev hi tun dinhmunah world number 9 a ni. ATP Finals khelh hmain tournament khelh hmabak an la nei. Turin, Italy-ah season tawp nan a thiam zual pariat ten inelna an hmachhawn dawn a, inlan phak nih ringawt pawh a hlu.