Chelsea tan Mount; Man Utd an chak zo lo

Chelsea-in manager thar Graham Potter hnuaiah hneh loh an la tawng lo, Pathianni zan khan Mason Mount goal hnih hmangin Villa Park-ah mualneitu Aston Villa 2-0 in an hneh. Inkhel dangah Manchester United leh Newcastle United goal awm loin an inhnehtawk.

Blues-in match kua aṭangin point 19 an hmu a, palinaah an awm. Erik ten Hag-a hote erawh Magpies lakah point khat chauh an hlawhchhuah avangin point 16 an hmu a, season thara Champions League khelh a awlsam dawn lo.

Mount a vul
Villa Park-ah Mount a vannei a, minute rukna lekah Villa defender Tyrone Mings tihsual chu awlsam takin a khung. England international Mount hian minute 65-naah freekick aṭangin a khung a, hei erawh a mawi thlawt - sawisel bo a ni.

Chelsea right back Reece James a inhliam a, World Cup pawh a khel dawn lo. Potter chuan right back-ah Raheem Sterling a hmang a, Manchester City forward hlui hian first half-ah crossbar a pet per.

Mikhual team tan keeper Kepa Arrizabalaga a che ṭha a, Villa player Danny Ings, John McGinn leh Jacob Ramsey te goal khung tur a dang vek. Season liam ta kha chuan Senegalese keeper Edouard Mendy a chet ṭha a, Kepa tan chhuah a finthlak ber ang. Tunah erawh Kepa a che ṭha leh tawh a, Chelsea no. 1 chu Spanish keeper hi a ni.

Chelsea tlarhnung tan Thiago Silva a pawimawh a, Brazilian defender hian tawnhriat ṭha tak a neih avangin Kalidou Koulibaly leh Trevoh Chalobah ten inzirna tur ṭhahnem tak an nei ang.

United tlarhma a bil
Old Trafford-ah manager ropui Sir Alex Ferguson a rawn inlan a, Scottish pachal hian club tana goal 700 khung thei Cristiano Ronaldo leh Man United tana match 500 khel David de Gea hnenah chawimawina a hlan.

Inkhelh hmain United ṭantute tan lawmna tur awm mah se goal an khung theih loh avangin inkhelh zawh hmaa chhuak an awm hial. Magpies boss Eddie Howe-a'n tlarhnung a rem phui ṭha a, Joelinton-a'n a zawn zatin cross bar leh a ban a tauh per. Man United hi an vanduai ṭum ni chak lo thei an ni.

Chutihrualin Ten Hag-a hote hi vanneih ṭum ni se chak thei an ni bawk. Ronaldo-a goal khung pawm a ni lo a, goal mamawh laia lakchhuah a nih avangin Portuguese forward hi a lawm lo.

Ronaldo thlaktu Marcush Rashford-a pass ṭha zet chu Fred-a'n goal ruakah a khung lo a, English forward Rashford hian hun tawp dawnah hnai tak aṭangin a tauh goal lo. Man United khingpui leh tur chu an elpui Tottenham Hotspur a ni a, October 19, Ningani zan hian Antonio Conte hote hi an mikhaul ang.