A zawnin vawi li chak lo

India ram chhung state hrang hrangte mipa senior cricket team hmanga inelna - Syed Mushtaq Ali Trophy khelh laiah Mizoram an che ṭha lo. Cricket Association of Mizoram (CAM) tirah kal team hian match li an khel tawh a, an tlawm vek.

Pathianni khan Saurashtra Cricket Association Stadium, Rajkot-ah Mizoram hian an match lina atan Assam an hmachhawn a, wicket sarihin an ngam lo. An match hmasa lamah Mumbai, Railways leh Vidarbha te an lo ngam lo tawh bawk a ni.

Mizoram hian vawiin hian Madhya Pradesh an hmachhawn leh dawn a, chumi hnuah Uttarakhand leh Rajasthan te nen an la inkhel leh dawn bawk. Team nem zual dahkhawmna 'Plate Group' siam a ni tawh lo a, hnehna chan a harsa ta hle.