Blasters vs Bagan - Goal sarih a lut!

Pathianni zan Indian Super League inkhel hmuhnawmah Mohun Bagan chuan 5-2 in Kerala Blasters an hneh a, Kolkata club tan Dimitri Petratos chuan hattrick a siam.

Jawaharlal Nehru Stadium, Kochi-ah Blasters chak lai hmuh beiseiin fans 34,000 chuang an pung khawm a, minute rukna lekah Ivan Kaliuzhnyi hmanga goal hmahruai an khung avangin beiseina pawh an nei sang hman.

Mahse, Bagan tan season hmasa lama A League club Western Sydney Wanderers tana khel Petratos chuan minute 26-naah si phurh a sut a, Joni Kauko chuan minute 38-naah a belhchhah bawk.

Second half-ah Blasters-in 'comeback' tum mah se Petratos chuan minute 62-naah a goal hnihna a khung leh a, 3-1 a ni. Mahse, mualneitu Kerala club an beidawng duh lo.

Bagan keeper Vishal Kaith chetsual zarzoin Rahul KP chuan si phurh a rawn sut ṭhen a, 3-2 a ni a, minute 81-na a ni bawk - Kerala tan 'comeback' chance a la awm.

Mahse, hun tawp nan minute hnih chauh a awm tawh tihah Lenny Rodrigues chuan Bagan tan a khung leh a, Petratos chuan hun pek belh minute hnihnaah hattrick siamna goal a khung bawk - Blasters tan thawh leh ngaihna a awm tawh lo.

Bagan-in an match hmasa berah Chennaiyin ngam lo mah se Blasters lakah an insiamṭha a, match hmasa bera East Bengal ngamtu Blasters an tlawm thung.

Kerala tan K. Lalṭhathanga'n inkhel bul a ṭan a, Bagan tan Lalrinliana Hnamte chu minute 86-naah bench aṭanga luhtir a ni bawk.

Indian Super League hi nizan aṭang khan chawlh rih a ni a, Ningani zan dar 7:30-ah match a awm leh chauh ang - NorthEast United leh East Bengal an intawng dawn.