Bayern an chak, Dortmund an chak lo

Bundesliga-ah champion lai Bayern Munich-in champion nawn ngei an tum tih lantirin Pathianni zan khan Freiburg chu 5-0 zetin an sawp. Bavarians-in hnehna an chan avangin Freiburg an lehpel a, pahnihna dinhmun an luah. Borussia Dortmund erawh an insiamṭha thei lo a, league hmahruaitu Union Berlin lakah 2-0 in an tlawm.

Allianz Arena-ah Bayern-in football mawina an pholang a, anmahni elpui thei tur zinga ngaih Freiburg lakah an chungnung hle. Bavarians hian a khat mawi tawkin goal an khung a; first half-ah Serge Gnabry leh Eric Maxim Choupo-Moting ten an khung hnuin second half-ah Leroy Sane, Sadio Mane leh Marcel Sabitzer ten goal khat ṭheuh an khung.

Champion nawn turin Bayern an la ṭha tawk a, Freiburg erawh Bavarians lakah an la tenau mah mah tiin a sawi theih. League hmahruai mektu Union Berlin erawh vannei satliah an ni lo a, team ṭha an ni tih pholangin Dortmund 2-0 in an hneh thung.

Union Berlin tan hian Janik Haberer-a'n first half-ah goal hnih a khung a, goal hmasa zawk hi Dortmund keeper Gregor Kobel chetsual vanga lut a ni. Dortmund hian league match hnuhnung pathumah chak hmel an hmu lo a, Bundesliga-ah champion an tum a nih chuan Edin Terzic hote hian insiamṭhat ran an mamawh hle.