Swiatek a champion leh ta

Iga Swiatek tan tun season chu hun duhawm a ni zel. World number 1 hian Pathianni zan khan San Diego Open final-ah Donna Vekic chu 6-3, 3-6, 6-0 in a hneh a, kuminah match 64 zet hnehna a chang tling ta.

Inrinni zana semifinal khelh laiin ruah a sur a, a hun pangngaiah Vekic hian a khel zo thei lo. Final hmain chawlh hahdamna hun a nei tlem zawk a, nomawi inchuhna inkhelah khel ṭha viau mah se a tawp lamah a chau tih a lang.

Poland nula Swiatek chuan, "Inkhel harsa leh inhnehtawk vek tak chu a ni. A tawpah chuan a vannei zawk ka ni a, ka vanneih chhan pawh tawnhriat ka ngah bakah hahchawlhna hun ka nei hnem zawk kha niin ka hria," a ti.

Chak lo mah se Vekic hi tun kara ranking chhuak tharah chuan 77-na aṭangin 47-naah a kaisang, a tum ber hlawhtling rih lo mah se ranking a siam sang thei hi season thar atan a ṭangkai ang.

Hnehna changtu Swiatek hian tun season chhungin nomawi 11 a chawi tling ta, heng zingah hian French Open leh US Open nomawi a tel. A tan chuan kum ṭha bik leh hriatreng tawh tur a ni ang.