Milan, Inter leh Napoli an chak

Pathianni zan Serie A inkhelah champion lai AC Milan, Inter Milan leh tun season hmahruai mektu Napoli ten hnehna an chang vek. Nikum aiin kuminah Italian champion nih tuma inelna boruak a sang chho ngei dawn niin a lang.

An player ṭha an chhuah nasat dan ngaihtuah chuan Napoli hi talbuai tura ngaih an ni. Mahse, Luciano Spalletti naute hian beisei phak baka ṭhain season an hmang mek. Bologna lakah pawh goal chhuah hmasa mah se 3-2 in an lehthal.

Naples khaw club tan Nunes Jesus, Hirving Lozano leh Victor Osimhen ten goal khat ṭheuh an khung a, mikhual Bologna tan Joshua Zirkzee leh Musa Barrow ten goal an khung ve thung a, awmzia erawh a nei thui ta lo.

Luciano Spalletti chuan, "Khelmual kan luh hian kan tum ber chu goal khung a ni a, chu chu fans lam pawhin an duh dan a ni. Kan khingpui te goal bulah a tam thei ang ber chet kan tum, tun ṭumah pawh khan chumi rah chhuah chu a tawpah kan chhawr," tiin a sawi.

Inkhel dangah AC Milan chuan Verona 2-1 in an hneh, hun tawp hma minute kua chauh awm tawhah Milan tan Sandro Tonali chuan chakna goal a khung. Stefano Pioli naute hian Napoli an kal faltir duh lo, an inkarah point thum chauh a awm.

Inter Milan tan harsatna a awm lo. Striker Lautaro Martinez leh midfielder Nicolo Barella te goal hmangin Salernitana 2-0 in an hneh, season hmasa pahnihna hi tun season kal laiah chuan pasarihna an ni mek, nomawi beiseina erawh a la sang.