PSG chhuahsan ka dil lo - Mbappe

Paris St-Germain chuan Pathianni zan khan Marseille 1-0 in an hneh, inkhela goal awmchhun khungtu ni Neymar a ni a, a siamsaktu chu Kylian Mbappe a ni thung - inkhel result tluk zetin a hnu lama a thusawi chuan sawi zui a hlawh.

Kum 23 mi Mbappe hian PSG chhuahsan a duh, a rang thei ang berin Paris aṭanga a puanthuah tel a duh, tih chu tun kar tawp match an neih hmaa kan hriat a ni. Marseille nen an inkhelh zawhah erawh Mbappe hian chhuah tumna a neih loh thu a sawi.

France international forward Mbappe chuan, "He hmunah hian ka hlim. January thlaah chhuah ka tum lo a, dil pawh ka dil lo. He thuthang hi engtianga rawn chhuak nge a nih ka hre lo, midang ang bawkin kei pawh min barakhaih," a ti.

Nipui transfer lai khan Mbappe hian PSG tana a contract a hmang zo a, nasa takin Real Madrid nen sawizawm an ni. Spanish club lian a zawm ngei dawn niin a lang hman a, mahse a club pangngai PSG tan contract thar a ziak ta zawk.

Mbappe hi a lungawi lo niin thuthang a tam, chhuak tur anga thawm a awm pawhin mipui lamin an ring nghal ṭhup. Mahse, tun dinhmunah chuan amah berin chhuah tumna a neih loh thu a sawi, thil thleng tur chu hunin a la hril zel ang.

PSG tan Lionel Messi a inlan leh thei tawh, hliam vangin Argentina captain hi match hnih a khel thei lo a, a lo kir lehna inkhelah goal khung nghal lo mah se manager Christophe Galtier leh a naute tan chuan Messi lo kir leh ta hi chanchin ṭha a ni.