Khawvelah Ronaldo a thiam ber

Thawhṭanni zan khan Best FIFA Football Awards sem a ni a, Cristiano Ronaldo chu khawvela footballer ṭha berah puan a ni. Real Madrid forward hian he chawimawina dawng tur hian Barcelona thiampuipa Lionel Messi leh khawvela foot­baller manto ber Neymar a khum.

Kum 32 mi Ronaldo hian Champions League leh La Liga-ah Real Madrid a cham­pion pui a, Best FIFA Men's Player chawimawina a dawn theih chhanah ngaih a ni. Hmeichhe footballer zingah Lieke Martens chu thiam bera puan a ni thung.

Ballon d'Or?
Best FIFA Football Awards hi vawi hnih sem a nihna a ni a, Ballon d'Or nen a in ang lo. Kum 1956 aṭang khan France Football magazine chuan Ballon d'Or bik hi a sem ṭan a, 2010-2015 inkarah khan FIFA nena thawkdunin FIFA Ballon d'Or tiin he chawimawina hi sem a ni.

Mahse, nikumah he thawh­dunna hi tihtawp a ni a, France Football-in a ngai rengin Ballon d'Or a kalpui a, FIFA-in Football Awards a hranin a kalpui thung.

Vote thlaktu
Khawvela football player leh coach ṭha ber thlanna bikah national team captain leh coach bakah journalist thlan bik ten vote an thlak a, fan-ten FIFA website-ah vote an thlak bawk - fans vote hian 25% a keng. Captain, coach leh journalist te hian top 1-3 thlengin vote an thlak a, pakhatnaa an dah hian 5 points, 2-na (3 points) leh 3-na (1 point) a ni.

Messi-a'n Barcelona tana a khelhpui Luis Suarez chu best player atan a vote a, Ronaldo-a'n Real tana a khelhpui Luka Modric a thlang ve bawk. India captain Sunil Chhetri-a'n Sergio Ramos a vote a, Real captain dawtah Ronaldo leh Messi a dah. Coach Stephen Constantine-a'n Pierre-Eme­rick Aubameyang a dah sang ber a, N'Golo Kante leh Toni Kroos-ten an dawt. Indian jour­nalist aiawha vote thlaktu Hindustan Times sports ziak­tu Dhiman Sarkar chuan Ro­nal­do a thiam berah a ngai a, ani dawtah hian Messi leh Gianluigi Buffon a dah.

A hming chu Ronaldo
Euro 2016-ah Ronaldo-a'n Portugal a champion pui a, Best FIFA Football Awards hmasa berah mipa footballer ṭha bera thlan a lo ni tawh. Kuminah a vawi hnih nan chawimawina a dawng leh ta a, he chawimawina dawng tur hian vote 43.16% a hmu. Ronaldo hnuaiah hian Messi (19.25%) leh Neymar (6.97%) an awm.

Ronaldo-a'n season hman zawh tak Champions League final-a Juventus 4-1 a an hnehna inkhelah goal hnih a khung a, La Liga nomawi an chawina kawngah match 29 khelin goal 25 a khung bawk. Portugal captain chuan, "England-a he chawimawina vawi khat sem a nihnaah a vawi hnih nan award ka dawng a, ka tan chuan hun duhawm tak a ni," a ti.

Chawimawina dang
Best Goalkeeper chawi­mawi­na hmasa ber chu Gian­luigi Buffon hnenah pek a ni - World Cup champion leh Serie A-a vawi 10 champion tawh keeper hian a zawna a vawi ruk nan Juventus chu nomawi a chawipui a, Champions League final an luhna kawngah minute 600 chhung goal a chhuah lo bawk. Real keeper Keylor Navas leh Bayern Munich keeper Neuer khumtu, kum 39 mi Buffon chuan, "Ka kum ang zata he chawimawina dawn hi chu ropui tak a ni," tiin a sawi.

European Championship 2017-a Netherlands champion puitu Martens chu hmeichhe footballer zinga thiam berah thlan a ni a, he chawimawina dawng tur hian vote 21.72% hmuin nikuma chawimawina dawngtu Carli Lloyd (16.28 %) leh Venezuelan forward Deyna Castellanos (11.69%) a khum. Hmeichhe inelna lianthama a vawi khat nana Netherlands champion puitu coach Wiegman chu hmeichhe coach ṭha berah thlan a ni a, Celtic fan-te chu best fans-ah thlan an ni bawk.