I League champion AFC an vul ṭan

Mizoram Premier League Season 6-a champion tura rinkai zinga mi Aizawl FC chuan Bethlehem Veng­thlang FC 5-1 a sawpin pa­hnihnaah an insawhnghet.

Aizawl FC hian point 16 hmuin point 10 zetin hmahruaitu Chhinga Veng pha lo mah se team pahnih hi khelmual chhungah an inhnaih ta hle. I League club che ṭha hi Chhingcows tan awm nawm lohna tham a tling.

Goal nga

Aizawl FC-in Romanian midfielder Andrei Ionescu an neih hnuah an goal nawr a na a, BVT laka goal nga an khung hma hian match hnuhnung pahnihah goal nga an khung bawk.

Nimin tlai inkhelah hian H. Lal­muan­kima'n bul a ṭan a, BVT lamin Lalnuntluanga penalty hmangin sut mah se Aizawl FC chhaih kawltu chauh a ni.

AFC captain David-a'n inkhelh a la thiam reng a, minute 25-naah Zemabawk North tlangval hian freekick aṭangin goal mawi a khung.

Hemi hnu hian Andrei-a thawhrah sengin Afghan defender Masih Saighani-a'n a khung belh a. Second half-ah substitute Rochharzela'n goal lina a khung hnuah captain David-a'n goal ropui a khung leh a, 5-1 in hnehna an chang.

BVT lam hi

Chawngthansanga hote hi tun dinhmunah semifinal khel pha zingah an tel tawh lo.

BVT hian nimin tlaiah goal zawnah vawi khat chiah an pet a, hei pawh hi penalty a ni.

Tun hnaiah an chet chhiat avangin insiamṭhat an mamawh a, point 12-a an cham rei chuan semifinal chuh loin relegate pumpelh an tum a ṭul ang.

ZoFooty Statistics
Aizawl FC 5 - 1 Bethlehem VT
AFC : Lalmuankima 17'; David Lalrinmuana 25', 88'; Masih Saighani 35'; Rochharzela 52'
BVT : Lalnuntluanga 20' (P)
MoM : David Lalrinmuana, AFC
54% Ball Possession 46%
15(10) Shots (On Target) 9(1)
2 Yellow Card(s) 0
0 Red Card(s) 0
Powered by Rainbow Multibrand Mobile Showroom