FIFA U17 World Cup ; Zaninah final khel tur a chiang dawn

India rama khelh mek FIFA Under 17 World Cup-in a tawp lam a hnaih ta - zaninah semifinal match hnih khelh a ni dawn a, Inrinni-a kum 17 hnuailam zinga thiam ber ram nih inchuh tur team pahnih a hriat thuai dawn.

Vawiin tlai dar 5:00-ah mipui nghahhlelh Brazil leh England an inhmachhawn dawn a, ram pahnih hi Indira Gandhi Athletic Stadium, Guwahati-a inhmachhawn tura tih ni zet mah se ruah sur nasat avangin an khelhna tur hmun hi final khelhna tur Salt Lake Stadium, Kolkata-ah sawn a ni.

Zanin dar 8:00-ah Mali leh Spain an inkhel dawn bawk a, ram pahnih inkhel tur pawh hi a hmuhnawm dawn - DY Patil Stadium, Navi Mumbai-ah an inkhel ang.

Guwahati to Kolkata

England leh Brazil inkhel tur hi a tirah Guwahati-a thlen tura tih ni mah se ruah sur vanga khelmualah buaina a awm avangin Kolkata-ah sawn a ni. Thawhṭanni tlai khan FIFA hotute leh Assam sorkara thuneitute an

ṭhukhawm a, England leh Brazil duhthlannaah an dah. England-in buaina an neih loh laiin Brazil erawhin Guwahati-a khelh an duh lo a, Kolkata-ah sawn a ni.

Assam Football Association president Hemendra Nath Brahma chuan, "England-in buaina an neih loh thu min hrilh laiin Brazil erawhin Guwahati-a khelh an duh lo. Khelmual lamah kan inpeih ngei theih nan theihtawp chhuah mah ila team lamin khelh an duh miau loh chuan tih theih kan nei lo," a ti a, Thawhṭanni tlai vek khan England leh Brazil team hian Kolkata an pan nghal.

Quarterfinal-a he khelmuala Mali lo hneh tawh lotu Ghana coach Paa Kwesi Fabin chuan Guwahati khelmual hi a lo sawisel tawh a, Kolkata lama semifinal sawn a ni hi a mak lo.

Lions an inpeih

England coach Steve Cooper chuan, "Bra­zil kan hmachhawn dawn avang maiin kan ruahmanna kan thlak lo ang. Eng team pawh hmachhawn dawn ila, kan ruahmanna ngaiah kan ding tlat zel. World Cup semifinal khel tur kan nih avangin kan theihna zawng zawng kan pe dawn a ni," a ti a, Brazil hmachhawn turin a inpeih tawh.

Ram pahnih inkhel tur nghahhlelhawmna belhchhahtu chu tun World Cup-ah England leh Brazil hian an hmachhawn apiang an la hneh vek - Young Lions hian last 16 zinkawngah Iraq, Mexico leh Chile an hneh a, last 16-ah Japan chu hun pangngaiah inhnehtawkpui mah se penalty hmangin an hneh leh a, quarterfinal-ah nuamsa takin USA chu 4-1 in an sawp. US laka hattrick siamtu Rhian Brewster chu Brazil tan ven uluk ṭul tur a ni.

Brazil-in knockout round lut turin harsatna an tawk lo a - Spain, Niger leh North Korea an hneh. Brazil hian last 16-ah pawh 3-0 in Hon­duras an la sawp a, quarterfinal-ah team ṭha Germany chu 2-1 in an hneh bawk. Brazil hian tun tournament-ah champion beisei ngam Spain leh Germany an lo hneh tawh avangin an ṭha tih a chiang a, tlarhmaah goal thum ṭheuh khung tawh Brenner, Lincoln leh Paulinho dan chu England tlarhnung tan hna hautak a ni ang.

Mali leh Spain

England leh Brazil inkhel tur ang emin Mumbai khawpuia Mali leh Spain inkhel tur hian ngaihven hlawh lo mah se team 24 aṭanga a thiam pali zinga invawrhkai thei an nih avangin ram pahnih inkhel tur hi a hmuhnawm lo ngawt thei lo.

Mali-in an hmachhawn tur Spain angin khawvel hriat hlawh lo mah se last 16-ah pawh goal nga ngawt an la khung theih avangin dah hniam an harsa. Africa khawmualpui aṭanga inlan team hian group stage-ah Paraguay ngam lo mah se New Zealand leh Turkey sawpin last 16 an lut a, Iraq chu 5-1 ngawtin an sawp zui. Quarterfinal-ah Ghana 2-1 in an hneh leh a, Paraguay laka an tlawm ṭum pawhin goal hnih an khung tho - goal khung an harsat lo tih a hriat a, goal nga khung tawhtu Lassana N’Diaye chu innghahna a ni.

Spain-in an match hmasa bera Brazil an ngam loh hnuah an hawikir tawh lo - Niger leh North Korea sawp chungin last 16 an lut a, team ṭha France chu 2-1 in an hneh zui. Quarterfinal-ah pawh Spain-in harsatna an nei zui lo a, Germany sawp thei Iran chu 3-1 ngawtin an hneh - captain Abel Ruiz hoin Mali an zuam ang.