Everton manager Koeman an ban

Ronald Koeman chu Premier League club Eveton manager a nihna aṭanga ban a ni. Koeman kaihhruaina hnuaiah Toffees hian league match an khelh hnuhnung vawi kuaah ṭum hnih chiah hnehna an chang a, table-ah 18-na niin division hniam lama tla thla thei dinhmunah an ding mek.

Dutch manager Koeman hian Pathianni kha chuan an dinhmun ṭha lo tak aṭangin a talchhuah pui theih ngei a beisei thu a sawi a, mahse a duh leh beisei angin thil a kal dawn ta lo. Thuchhuah siamin Everton chuan, "Everton Football Club leh Ronald Koeman chu kan inṭhen fel. Chairman Bill Kenwright, Board of Directors leh shareholder lian ber Farhad Moshiri te chu Ronald-a'n thla 16 chhunga he club a enkawl tawhnaah leh season hmasa Premier League-a pasarihna min nihpui avangin a chungah kan lawm hle," tiin an sawi.

Tun season chhungin Frank de Boer (Crystal Palace) leh Craig Shakespeare (Leicester City) ten an hna an chan tawh a, Koeman hi Premier League season kal laia manager ban pathumna chiah a ni. Koeman bakah hian assistant leh a unaupa ni bawk Erwin bakah fitness coach Jan Kluitenberg leh goalkeeping coach Patrick Lodewijks te chuan an hna an chan zui nghal bawk a ni.

Everton hian beisei an phak lo tih chu thil chiang a ni a, chutihrualin Dutch manager hian fixture a nei awlsam lo. Premier League-ah tun season chhunga team hlauhawm Manchester City an tlawh a, Eihad Stadium-ah hian point an hlawh chhuak thei. Champion lai Chelsea, Manchester United, Tottenham leh Arsenal te an hmachhawn zui bawk avangin Koeman hian chhuanlam tur a zawng a nih chuan sawi tur a haihchham bik lo ang.

A bilh a tho lo

Everton hian season hmasa league goal 25 khung thei Romelu Lukaku chu Manchester United lakah an chan a, an striker palian an hralh avang hian player dang lei nan sum an ngah - nipui bazarah khan pound maktaduai 150 bawr vel an hmang.

England tana goal khung hnem ber Wayne Rooney an lalet a, tlarhnung ti phui turin goalkeeper Jordan Pickford bakah England defender Michael Keane an lei a, inkhel khaikhawm turin Ajax captain Davy Klaassen leh Gylfi Sigurdsson an neih belh bakah Malaga aṭangin Spain Under-21 striker Sandro Ramirez an lalut bawk.

Sum an hmang hnem a, fans an phur tluk zetin club thuneitu lam pawhin beiseina an nei sang bawk. Amaherawhchu, league lam an talbuai bakah Europa League-ah pawh beisei an phak lo takzet - Merseyside club hian Atalanta leh Lyon hneh loin Apollon Limassol an inhnehtawk pui a, tunah hian Group E mawngphah an ni.

Tu nge thlak ang?

Kum 54 mi Ronald Koeman a chhuah takah chuan a hmunruak luah thei tura hming lamrik an tam nghal hle. Tun dinhmunah chuan assistant manager David Unsworth-a'n a enkawl lailawk rih dawn.

Everton hian player langsar an kawl hnem a, thuneitu lam pawhin club vangtlang chung lama awm thei turah an inngaih avangin manager tur hming pawh an lam ri lian hle. Carlo Ancelotti, Thomas Tuchel, Eddie Howe, Sean Dyche, Rafael Benitez, David Unsworth, Sam Allardyce, David Moyes, Marco Silva leh Mikel Arteta te chu khawthlang media ten an

hmehbel mek.

Darkar 24 chu...

Pathianni zan: Goodison Park-ah Arsenal lakah Everton 5-2 in an tlawm a, club-a thuneihna nei hnem ber Farhad Moshiri leh chairman Bill Kenwright ten an club tlawm lai a hmunah an en.

Thawhṭanni chawhma: A dan pangngaiin Koeman-a'n Finch Farm-ah a player-te training a neihpui.

Tawhṭanni chhun: Koeman-a ṭhian hnai tak chuan club thuneitu lam aṭanga an manager an la rintawk thu a sawi.

Thawhṭanni chawhnu: Kenwright leh chief executive Robert Elstone ten Finch Farm-ah an manager an hmu a, Moshiri chuan Koeman banna thu a ziak.

Thawhṭanni tlai: Everton chuan an manager Ronald Koeman an ban thu an tarlang a, amah thlaktu tur erawh an la sawi chiang lo.