Zaninah Taekwondo Fight League semifinal

Mizoram chhunga taekwondo inelna lian leh ngaihhlut ber GIG Motors Taekwondo Fight League 2 chu zanin dar 8:00 hian Electric Veng YMA Hall-ah semifinal khelh a ni dawn.

Zanin hian league round lama hmahruaitu Armed Veng Warriors chuan Zopa Goldsmith Chawnpui an hmachhawn dawn a, champion lai Ramhlun Sporting Club Fighters leh Kolasib Fighters ten final luh an inchuh bawk ang - zanin hian TFL dance competition zawh fel nghal ni ang.

Chak vek Armed Veng

League match vawi nga an khelhah Armed Vengin hnehna chang fai vekin semifinal an lut a, Chawnpui lakah rinkai zawk an ni. An khelh hnuhnun berah Warriors an che ṭha lehzual a, an lakah beisei a sang hle. League round hmasa ber Armed Vengin 60-39 in Chawnpui an hneh tawh.

Armed Veng an kaltluan lai hian an khingpui tur Chawnpui erawh an tlang zo lo teuh hle. League an khelh hnuhnun berah CMTC Hlimen Rollers lakah point khatin an tlawm. Mahse, derthawng takin league table-ah palina an ni a, semifinal lut thei zinga hniam ber niin tun dinhmuna team ṭha leh khawng ber Armed Veng hmaah fiahna khirh an su dawn.

Champion zia

Champion lai Ramhlun hian Kolasib hmaah Fighters dik tak zawk an ni tih an entir tawh, league-a an insut ṭumin Aizawl pawn team awmchhun lakah 103-98 in an chak. Mahse, hemi ṭum hian judge-te point pek danah Kolasib an lungawi lo nasa.

Kolasib lam hian zaninah phuba lak theihna hun ṭha an nei dawn a, kawng thui tak an zawh tawh chu a lo thlawn maia luan raltir an duh dawn loh avangin inkhel a hmuhnawm ang.