Champion theih inring Spalletti

Inter Milan manager Luciano Spalletti chuan Juventus chiah hi Serie A nomawi chawi tur an ni bik lo a, Inter pawh champion thei an nih thu a sawi chhuak.

Tun hnai season ruk chhung ngawt chu Juventus hian Serie A-ah rorelin nomawi an hui vek a, tun season-ah erawh Napoli, Inter, Lazio leh Roma ten Turin club hi an elphak rih hle.

AS Roma chhuahsana Inter Milan enkawltu Spalletti chuan, "Kan chakna leh chak lohna lai kan inhrechiang a, team kan hmachhawn tura zirin insiam rem dan kan hre bawk. Tuna kan khelh danah hi chuan lawm lohna tur ka nei lo, huaisen taka kan bei zel a nih chuan league champion kan ni thei em em ang," tiin a sawi.

Italian Serie A season kal laiah Napoli leh Inter Milan ten hneh loh an la tawng lo a, Inter hian point 23 hmuin pahnihna an ni. An chunga awm Napoli aiin point hnihin an hniam a, champion lai Juve aiin point khatin an sang zawk - season dang ang lo takin nomawi inchuh boruak a sang chho hle tura ngaih a ni.