Ballon d'Or: Karim Benzema kutah hlan a ni ta

Khawvela footballer ṭha ber chawimawina Ballon d'Or (2021-22) dawngtu chu Thawhṭanni zan khan puan a ni ta a, Real Madrid striker Karim Benzema aia footballer ṭha zawk an awm lo.

Kum 34 mi Benzema tan Ballon d'Or chawimawina a dawn hmasak ber a ni a, he award dawng tur hian season hmasa khan Real tan match 46-ah goal 44 a khung a, assist vawi 15 neiin, Champions League leh La Liga nomawi a chawipui bawk.

Bayern Munich forward, season hmasaa Liverpool tana la khel Sadio Mane chu pahnihna a ni a, Manchester City tana Premier League nomawi chawitu Kevin de Bruyne chu pathumna a ni.

Ballon d'Or sem hnuhnung 13 zinga 12 chu Lionel Messi (7) leh Cristiano Ronaldo (5) ten an dawng a, mahse, tun ṭumah erawh Ronaldo hi 20-na a ni phak hram a, Messi chu nominee zingah a lang phak lo!

Naupang duhthusam
Kum 34 mi a ni tawh a, Benzema hian khelmual chhungah rei tak hun a hmang tawh dawn lo tih a chiang - mahse, Cristiano Ronaldo hliahkhuhna hnuaia fak hlawh tawk lo striker hian hming chher turin tlai luat a awm lo tih a pholang a, Ballon d'Or meuh a dawng ta.

Benzema chuan, "He award ka dawng thei hi ka inchhuang takzet a ni. Naupang kan nih lai chuan hetiang award dawn hi ka suangtuah ṭhin a, ka beidawng ve ngai lo - eng pawh a tih theih a ni.

"Ka zinkawng zawhte kha ka chhuang em em a, a awlsam lo. Ka tan chauh a ni lo a, ka chhungte tan pawh zinkawng awlsam a ni lo," a ti a, a mang ram thleng tura a beihnaa puitu a chhungte a theihnghilh lo.

Kum 1998 khan Zinedine Zidane chuan he award hi a lo dawng tawh a, Zidane hnua French player zinga Ballon d'Or dawng leh thei hmasa ber chu Benzema hi a ni.

Benzema sulhnu
France international Benzema danglamna chu hun pawimawhah a rah ṭhin - season hmasa Champions League-ah khan Paris Saint-Germain (last 16) leh Chelsea (quarterfinal) lakah hattrick a siam a, semifinal-a Manchester City an tawn ṭumin match hnihahgoal thum a khung bawk.

Benzema hnuai chiahah Mane a awm a, Bayern forward hian season hmasa khan Liverpool tan match 51-ah goal 23 khungin FA Cup leh League Cup-ah a champion pui a, a buk tirittu pakhat erawh Senegal tana AFCON nomawi a chawi leh World Cup a inpetkaipui chu a ni.

Mohamed Salah-a'n match 51-ah goal 31 leh assist 16 nei mah se African football-ah Mane a ngam loh avangin pangana a ni phak hram a, a chung chiahah Bayern tana match 46-a goal 50 khungtu Robert Lewandowski a awm.

Kevin De Bruyne-a'n season hmasa khan Premier League-ah City a champion pui a, match 45-ah goal 19 khunga assist vawi 14 a neih bawk avangin PL Player of the Season-a ni hial - Ballon d'Or-ah erawh pathumna a ni phak hram.

Ballon d'Or thlan dan
Kum dangah chuan Ballon d'Or dawng tur hi kum khat (calendar year) a an chet ṭhat dan aṭanga teh a ni ṭhin a, mahse, kumin aṭangin season khata an chet dan chu teh nan hman a ni. Chumi awmzia chu tun season-ah hian 2021-22 a footballer te khelh dan chu Ballon d'Or dawng tur teh nan hman a ni a, tun hmaa ram 180 aṭanga journalist pakhat ṭheuhin vote an neih ṭhin chu ram 100-ah tihhniam a ni a, FIFA men's world ranking-a top 100 chin ram aṭanga journalist-ten vote an thlak - hmeichhia bikah chuan hmeichhe ranking-a top 50 ram ten vote an thlak thung.

Socrates Award: Sadio Mane chu midang ṭanpuina kawnga a inhman nasat avangin Socrates Award hlan a ni.

Yashin Trophy: Real Madrid keeper Thibaut Courtois chu goalkeeper ṭha berah thlan a ni a, Liverpool keeper Alisson leh Manchester City keeper Ederson ten an dawt.

Gerd Muller Trophy: Barcelona striker Robert Lewandowski-a'n season hmasa khan Bayern Munich tan match 46-ah goal 50 a khung a, assist vawi sarih a nei bawk a, a kum zawnin striker of the year-ah thlan a ni.

Ballon d'Or Féminin: Barcelona forward Alexia Putellas hnenah hmeichhe footballer ṭha ber award hlan a ni a, a zawna vawi hnih a dawnna a ni. Kum 28 mi midfielder hian season hmasaah khan Barca tan match 37 khelin goal 28 a khung a, Primera División, Champions League, Copa de la Reina leh Supercopa de Espana-ah Barca a champion pui.

Club of the Year: Ballon d'Or dawng thei tura nominee paruk nei thei, Premier League champion Manchester City chu club of the year-ah thlan an ni a, an hnuaiah nominee paruk neitu Liverpool leh panga neitu Real Madrid an awm. Award hi season hmasa aṭanga sem a nih avangin player-te chu season hmasaa an club khelhna zel chhiar a ni.