Rawlthar duhawm ber Gavi

Kum 21 hnuai lam player ṭha ber thlanna, Kopa Trophy chu Barcelona midfielder Gavi hnenah hlan a ni a, Spain tana vawi 12 inlan tawh rawlthar duhawm hi kum 18 mi chauh a la ni.

Gavi hian season hmasa khan Barca tan inelna hrang hrangah match 47 khelin goal hnih a khung a, assist vawi ruk a nei tel bawk - kum 20 em pawh a la ni lo chungin European football-a player hmuhnawm ber pawl a ni der tawh.

Arsenal winger ṭhangduang Bakayo Saka chu pahnihna a ni a, kum 21 mi Saka hian season hmasa khan Gunners tan match 43 khelin goal 12 a khung a, assist vawi sarih a nei bawk.

Real Madrid midfielder duhawm Eduardo Camavinga chu pathumna a ni a, France tana vawi li inlan tawh midfielder hi kum 19 mi chauh a la ni - season hmasa khan Real tan match 40 khelin goal hnih a khung a, Champions League leh La Liga nomawi a chawi bawk.

Bayern Munich player ṭhangduang Jamal Musiala chu palina a ni a, season thara Liverpool zawm tura sawi, Borussia Dortmund midfielder Jude Bellingham chu pangana a ni.