Old Trafford-ah champion beisei Spurs
Manchester United-in an league match hnuhnung berah Newcastle United chu 0-0 in an inhnehtawkpui a, coach Erik Ten Hag-a tan result ṭha tia sawi tur a ni lo.
Zanin dar 12:45-ah United an inlan zui dawn a, an hmachhawn tur hi Tottenham Hotspur an nih avangin a awlsam lo ang - Spurs hian an league match hnuhnung berah Everton chu 2-0 in an hneh.
London club hian league match 10 aṭangin point 23 an nei tawh a, 1963 hnua season bul an ṭan ṭhat ber a ni - vawi khat chiah an la tlawm.
Ten Hag-a tihsual
United-in October 14 khan Europa League an khel a, Cypriot club Omonia Nicosia lakah an ṭhat dan bera an inlan chungin injury time-a Scott Mc Tominay goal hmangin an chak hram a, 1-0 a ni.
United player-ten chawlh hahdamna hun pawh nei loin Pathianni zanah league match khelin Newcastle an hmachhawn zui a, player-te an chau tih a lang a, Europa League-a player-te chawlh hahdamtirna chang hre lo Ten Hag-a'n dem a hlawh.
November - December-ah World Cup khelh a nih dawn miau avangin fixture a tawt lo thei lo a, zaninah United hi an inlan zui dawn a, team ṭha Spurs an mikhual dawn bawk si avangin United ṭantute lu a hai khawp ang.
Khung rawh u!
United-in Magpies lakah vawi 15 zet shot an nei a, Omonia lakah vawi 34 shot an nei bawk. Red Devils hian an match hnuhnung pahnih aṭangin vawi 49 shot an nei tihna a ni a, goal khat chiah an khung thung.
Ten Hag tan tlarhma lamah ngaihtuahna sen a ṭul a, Marcus Rashford, Jadon Sancho, Bruno Fernandes leh Antony-te tan mawhphurhna a sang dawn - Cristiano Ronaldo a la awm bawk.
United tan midfielder damlo Christian Eriksen dam hun tur sawichian theih a la ni lo a, zaninah a inlan hman lo a nih chuan midfield-ah Scott McTominay leh Casemiro an inkawp a ṭul ang.
Conte a fimkhur
Season hmasa khan Old Trafford-a an inhmachhawn ṭumin United-in 3-2 in Spurs an hneh a, Ronaldo-a'n hattrick a siam - Antonio Conte-a'n he thil thleng hi a la theihnghilh lo a, thlen nawn lohtir a tum.
Italian coach chuan, "Season hmasa khan kan lakah hattrick a siam a, player ropui, a khelhna apianga danglamna thlen ṭhin chungchang kan sawi a nih hi. Cristiano hi ka ngaisang a, mahse, tun ṭum chu a insum deuh ka beisei. 3-2 a kan tlawm khan United lakah ni loin Ronaldo lakah kan tlawm a ni," a ti!
Mahse, Ronaldo hian tun hnaiah match hnih chu a zawnin bul a ṭan tawh a, kum 37 a nih tawh bawk avangin Ten Hag-a'n a zawna match thum chhawr a zuam lo mai thei.
Spurs an ṭha
Conte-a'n champion tura transfer window vawi hnih tal an la hman a ṭul thu sawi mah se, khelmuala an che tla velin thawnthu dang min hrilh a, London club hian inkhel hmuhnawm leh result ṭha min hlui ṭhin - United tan a awlsam lo ang.
Spurs hian league match 10-ah goal 22 ngawt khung tawhin Arsenal (24 goals) leh Manchester City (33) chiah goal khung tam lamah an phak lo a, goal 10 chiah la chhuahin anni aia chhuah tlem chu Magpies (9) chiah an awm bawk.
A tawi zawnga sawi chuan tlarhnung leh hmaah Spurs an ṭha a, hliam vangin Dejan Kulusevski dinhmun chiang lo mah se tun season-a goal 10 khung tawh Harry Kane leh goal nga khungtu Son Heung-Min an neih avangin lungphanna tur a ni lo.
Nizan Inkhel (Result kan hre hman lo)
Brighton & Hove Albion 12:00 AM Nottingham Forest
Crystal Palace 12:45 AM Wolverhampton Wanderers
Zanin Inkhel Tur
AFC Bournemouth 12:00 AM Southampton
Brentford 12:00 AM Chelsea
Liverpool 12:00 AM West Ham United
Newcastle United 12:00 AM Everton
Manchester United 12:45 AM Tottenham Hotspur
October 20, Zirtawpni
Fulham 12:00 AM Aston Villa
Leicester City 12:45 AM Leeds United