Electric Veng coach thar Remtluanga

Mizoram Premier League club Electric Veng FC chuan Thawhṭanni khan coach atan tawnhriat nei ṭha Lalremtluanga (RT-a) an lakluh thu an puang a, Mizoram team pawh enkawl tawhtu coach RT-a hian October 20, Ningania FC Bethlehem an hmachhawn hunah EFC a kaihruai nghal ang.

EFC chuan, "EFC coach Jacob Lalrawngbawla nen inhriatthiam tawnnain kan inṭhaṭhen ta a, EFC tana a hnathawhna zawng zawngah lawmthu kan sawi," tiin thuchhuah an siam a, coach Jacob-a rual hian manager Vanlalsawma Colney leh coaching staff dang pawhin an hna an kalsan bawk.

Electric Veng hian match sarih khelh zawh tak aṭangin point li chauh an hmu a, table mawngphahah an awm mek. EFC leh coach Jacob-te inṭhen hma hian Chanmari FC leh coach Rochhingpuia te an inṭhen tawh bawk. Mizo midfielder ṭha zinga sawi ṭhin pahnih Jacob leh Chhinga ten MPL club an enkawl hmasak berah hlawhtlinna an hmu lo.

MPL-ah hian player lakluh hun a tawp tawh a, club khelhna nei lo player (free agent) pawh lakluh theih a ni lo. EFC hi an squad a chhah tawk loh avangin coach tawnhriat nei ṭha RT-a tan pawh a harsa ang.

Electric Veng FC coach thar Lalremtluanga chuan, "Min mamawh a, min ring tawk a, sawmna ka dawn pawhin a harsa dawn tih min hrilh sa. Football hmangaihtu tan chuan sawmna hi hnar phal chi a ni lo a, a harsa dawn tih hre chungin chona hi ka theihna zawng zawng nen ka hmachhawn ang," tiin Vanglaini a hrilh.

RT-a hi MPL-ah a mikhual tawh lo a; Dinthar FC, Chhinga Veng FC leh Chawnpui FC a enkawl tawh. Mizoram tan pawh sulhnu ṭha tak a nei a, kum 2016 khan National Junior C'ship-ah Mizoram chu final thlenpuiin kum 2019-ah a champion pui. RT-a hian kum 2019 khan Mizoram team chu fSantosh Trophy final round a thlenpui a, Covid-19 vangin khelh chhunzawm theih a ni lo. Mizoram senior team hi Dr TAo Football 2020-ah a champion pui bawk.